საქართველოს რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, სურამს განვითარების გენერალური გეგმა ექნება. მისივე თქმით, გადაწყვეტილება 13 ივნისის მთავრობის სხდომაზე მიიღეს სივრცითი მოწყობის გეგმის ფარგლებში.

"როგორც იცით, სივრცითი მოწყობის ფარგლებში ჩვენი სამინისტრო ახორციელებს ტურისტულად მნიშვნელოვანი და საინტერესო ლოკაციების სივრცითი მოწყობის გეგმებს, რაც გულისხმობს ამ ტერიტორიებისთვის ახალი ფუნქციების მოძიებასაც, ასევე არსებული ფუნქციების აღდგენას და რაც ძალიან მნიშვნელოვანია, მათ ტერიტორიებზე განაშენიანების ისეთი სახის რეგულირებას, რომელიც მოსახლეობას საშუალებას მისცემს, იქ სრულფასოვანი საერთაშორისო სტანდარტების მქონე კურორტები ჩამოყალიბდეს. ჩვენ დღეს გადავწყვიტეთ, რომ სურამის განვითარებს გეგმას დავიწყებთ, განვახორციელებთ და შესაბამისად, უკვე სურამის განვითარებაზეც ერთობლივად ვიმუშავებთ", — განაცხადა მაია ცქიტიშვილმა მთავრობის სხდომის დასრულების შემდეგ

მისივე განმარტებით, გამოცხადდება ტენდერი გენერალურ გეგმაზე და პროცედურების გათვალისწინებით ერთ წელში უკვე მზად იქნება.

დასაგეგმარებელი ტერიტორიის საორიენტაციო საზღვრებში, კონკურსში გამარჯვებული კომპანია ვალდებული იქნება მოამზადოს დაბა სურამის გენერალური და ცენტრალური უბნის განაშენიანების გეგმების პროექტები, ასევე გარემოსდაცვითი შეფასების კოდექსით გათვალისწინებული დოკუმენტაცია.

1948 წელს სურამი რესპუბლიკური მნიშვნელობის კურორტად გამოცხადდა. უნიკალური ბუნებრივი კლიმატი, მისი გეოგრაფიული მდებარეობა დაბას ადვილად მისადგომს ხდის როგორც აღმოსავლეთ, ისე დასავლეთ საქართველოში მცხოვრებთათვის. სურამში ბევრი კულტურული ძეგლია, რომელიც ტურისტებისთვისაა საინტერესო.

"რადგან სურამს არ გააჩნია გენერალური გეგმა, არსებობს საფრთხე, რომ ტურისტების გაზრდილი რაოდენობის ფონზე აქტიური სამშენებლო საქმიანობები, უსისტემო განაშენიანება ზიანს მიაყენებს დაბას. ამიტომ, დღის წესრიგში დადგა მდგრადი განვითარების პრინციპებზე დაფუძნებული ქალაქთმშენებლობითი გეგმების შემუშავების აუცილებლობა. კურორტის აღორძინებისა და განვითარების ხელშეწყობის მიზნით, ასევე, მნიშვნელოვანია მოხდეს ცენტრის ფუნქციის მატარებელი საზოგადოებრივი სივრცის განსაზღვრა და დაგეგმარება", — აცხადებენ რეგიონული განვითარებისა და ინფრასტრუქტურის სამინისტროში.

განაშენიანების გეგმების შემუშავებისას პრიორიტეტულად გასათვალისწინებელი საკითხებია — კურორტის ბუნებრივი პირობებისა და მინერალური წყლების გონივრულად გამოყენება, სურამის საბავშვო კურორტის ფუნქციის აღორძინება, ადმინისტრაციულ-საზოგადოებრივი ცენტრის კომპლექსურად მოწესრიგება, არქიტექტურულ-ესთეტიკური იერ-სახის გაუმჯობესება, ქაოსური სამშენებლო სამუშაოების წარმოების რისკის შემცირება, ებრაელთა უბნისა და სინაგოგის არსებული ვითარებისა და შესაძლებლობების ანალიზი, სურამის რკინიგზის სადგურის რეკონსტრუქცია, ე. წ. ბრაუნფილდის - არსებული და მიტოვებული სამრეწველო ობიექტების პერსპექტივის განსაზღვრა.