გაეროს გენერალურმა ასამბლეამ (UNGA) უკრაინის დროებით ოკუპირებულ ტერიტორიებზე ადამიანის უფლებების შესახებ რეზოლუცია მიიღო, რომელსაც ხელს 79 ქვეყენა, მათ შრის საქართველოც აწერს. ამის შესახებ ინფორმაციას უკრაინული მედია ავრცელებს.

რეზოლუციის სახელი ასეთია: "ადამიანის უფლებების მდგომარეობა უკრაინის დროებით ოკუპირებულ ტერიტორიებზე, მათ შორის ყირიმის ავტონომიურ რესპუბლიკასა და ქალაქ სევასტოპოლში".

დოკუმენტი მოიცავს ადამიანის უფლებების მდგომარეობას უკრაინის ყველა იმ ტერიტორიაზე, რომლებიც რუსეთის მიერ დროებით არის ოკუპირებული და რუსეთის საოკუპაციო ადმინისტრაციის მიერ ადგილობრივი მოსახლეობის წინააღმდეგ ჩადენილი სისტემური დარღვევების გაძლიერებულ მონიტორინგს ითვალისწინებს.

გარდა ამისა, დოკუმენტი მკაფიოდ გმობს რუსეთის აგრესიულ ომს უკრაინის წინააღმდეგ, ადასტურებს უკრაინის სუვერენიტეტსა და ტერიტორიულ მთლიანობას მისი საერთაშორისო დონეზე აღიარებული საზღვრების ფარგლებში.

რეზოლუცია ასევე სერიოზულ შეშფოთებას გამოთქვამს ოკუპირებული ტერიტორიების მილიტარიზაციის, რუსეთის შეიარაღებულ ძალებში მათი მაცხოვრებლების იძულებითი მობილიზაციის, ჟურნალისტების, ადამიანის უფლებათა დამცველებისა და სამოქალაქო საზოგადოების წარმომადგენლების დევნის, ასევე კულტურული მემკვიდრეობის განადგურების გამო, მათ შორის ყირიმში.

გაეროს გენერალურმა ასამბლეამ რუსეთს მოუწოდა, უზრუნველყოს წითელი ჯვრის საერთაშორისო კომიტეტის (ICRC) შეუფერხებელი წვდომა დაკავების ადგილებზე, უზრუნველყოს სათანადო სამედიცინო დახმარება, განახორციელოს სამხედრო ტყვეების სრული გაცვლა და გაათავისუფლოს ყველა უკანონოდ დაკავებული პირი.

გაერო ასევე მოითხოვს, რომ რუსეთმა დაუყოვნებლივ შეწყვიტოს აგრესია და სრულად გაიყვანოს თავისი ჯარები უკრაინის ტერიტორიიდან.

დოკუმენტს მხარი 79 ქვეყანამ დაუჭირა, წინააღმდეგი 16 იყო, ხოლო თავი 73-მა შეიკავა. დოკუმენტი მიღების წინააღმდეგ ხმა რუსეთმა, ბელარუსმა, ჩრდილოეთ კორეამ, ჩინეთმა, ირანმა, ბურკინა-ფასომ, ერიტრეამ, სუდანმა, მალიმ, ზიმბაბვემ, ბურუნდიმ, ცენტრალური აფრიკის რესპუბლიკამ, კონგომ, გვინეამ, კუბამ და ნიკარაგუამ მისცეს.

გაეროს გენერალურმა ასამბლეამ ასევე 1986 წლის ჩერნობილის ატომური ელექტროსადგურის კატასტროფის შედეგების შემცირებისა და საერთაშორისო თანამშრომლობის გაძლიერების შესახებ უკრაინის მიერ ინიცირებული რეზოლუცია მიიღო. დოკუმენტს მხარი 97-მა ქვეყანამ დაუჭირა. შეერთებულმა შტატებმა რუსეთსა და ბელარუსთან ერთად მის წინააღმდეგ მისცა ხმა.