ქართული ოცნების დეპუტატის, მამუკა მდინარაძის განცხადებით, ანდერს ფოგ რასმუსენის აზრი საქართველოს ნატოში ინტეგრაციასთან დაკავშირებით, დღის წესრიგში არ დამდგარა.

მისი განცხადებით, არც ნატოს საპარლამენტო ასამბლეის პრეზიდენტთან, მადელინ მუნისთან დაუყენებიათ აღნიშნული საკითხი. მამუკა მდინარაძე არ გამორიცხავ ამ საკითხზე მსჯელობის დაწყებას, თუმცა კატეგორიულად ეწინააღმდეგება "სპეკულაციებს", რომელიც ამ თემას მოჰყვა.

"ეს იყო ჩვენი ექსპერტი მეგობრის, ნატოს ყოფილი ხელმძღვანელის აზრი, ხომ არ გაიმართება დისკუსია არა იმაზე, რომ საქართველოს ტერიტორიული მთლიანობა ვინმემ დააყენოს ეჭვქვეშ, არამედ იმაზე, რომ მხოლოდ და მხოლოდ მეხუთე მუხლი გავრცელდეს იმ ტერიტორიაზე, რომელსაც საქართველო აკონტროლებს. ეს იყო სამსჯელო თემად შემოტანილი და ამის გადაქცევა რაღაც ისეთ თემებად, სადაც ვიღაცამ ვიღაცას მოღალატე უნდა უწოდოს, არის მიუღებელი. არსებობს თემები, სადაც პოლიტიკური განცხადებების საკუთარი მიზნებისთვის გაკეთება ქვეყანას აზიანებს და ასეთ განცხადებებს თავი უნდა დავანებოთ", — ამბობს მდინარაძე.

მისივე თქმით, რასმუსენი ავტორიტეტული და გამოცდილი ექსპერტია და მისი მიზანი ნატოში საქართველოს სწრაფი ინტეგრაცია იყო.

"სამსჯელო შეიძლება იყოს ნებისმიერი თემა, მაგრამ მსგავსი საკითხი დღის წესრიგში არ დამდგარა. პირველი შემთხვევა იყო, როცა მსგავსი საკითხი ექსპერტის დონეზე დაისვა და ვიმსჯელებთ თუ არა ეს ხვალინდელი საკითხია. ჯერჯერობით ფორმატი, სადაც მსგავს საკითხებზე ყოფილა მსჯელობა არ ყოფილა და წინასწარ ვერ დაგიდასტურებთ", — განაცხადა მამუკა მდინარაძემ.

10 სექტემბერს თბილისში, სასტუმრო რუმსში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ კონფერენციაზე ნატოს ყოფილმა გენერალურმა მდივანმა, ანდერს ფოგ რასმუსენმა საქართველოს ნატოში დაჩქარებულ გაწევრიანებაზე ისაუბრა. რასმუსენმა განმარტა, რომ ჩრდილოატლანტიკურ ალიანსში გაწევრიანების მომდევნო ნაბიჯი საქართველოს არჩევანზეა დამოკიდებული. მისი შეთავაზება საქართველოსთვის ნატოში გაწევრიანების "გერმანულ მოდელს" გულისხმობს, რაც ნიშნავს, რომ საქართველო საერთაშორისოდ აღიარებული საზღვრებით შევა ნატოში, ხოლო კოლექტიური თავდაცვის მუხლი ოკუპირებულ ტერიტორიებზე დეოკუპაციის შემდეგ ამოქმედდება.

ამავე იდეის ირგვლივ ჰერითიჯის ფონდის ანგარიში ანალიტიკოსმა და პოლიტიკურმა მიმომხილველმა, ლუკ კოფმა მოამზადა. ლუკ კოფი განმარტავს, რომ მისი წინადადება არ აყენებს საქართველოს ტერიტორიულ მთლიანობას კითხვის ნიშნის ქვეშ.