პალამენტში, სადაც ევროპული საქართველოს ფრაქცია პრემიერობის კანდიდატს, გიორგი გახარიას უსმენს კამათის მიზეზი გახდა 20 ივნისს გამოყენებული ტყვიები. დეპუტატი ირმა ნადირაშვილი ამტკიცებდა, რომ ტყვიები ლეტალურია და არ უნდა გამოეყენებინათ, რასაც გახარია უარყოფდა და მტკიცებულებად დეპუტატს ტყვია გადასცა. ამ დროს საუბარში ჩაერთო დეპუტატი აკაკი ბობოხიძე და გახარიას მიმართა: "შევამოწმოთ, ერთი მე მესროლეთ და ერთს მე გესვრით".

პასუხად პრემიერობის კანდიდატმა განაცხადა: "სიამოვნებით, ოღონდ დარბაზში არა. ამაზე, უბრალოდ, ვერ გიპასუხებთ იმიტომ, რომ თქვენ ჩვეულებრივი ხულიგანი ხართ და მე პასუხისმგებლობა მაქვს".

ნადირაშვილმა განაცხადა, რომ ის ექსპერტების დასკვნებს ეყრდნობოდა და ფაქტებიც არსებობდა, რომ ტყვიამ ადამიანების ორგანიზმში შეაღწია.

გახარიამ აღნიშნა, რომ ამ ტყვიებს ისევ გამოიყენებენ "მაშინ, როდესაც სახელმწიფო ინსტიტუტების და მოქალაქეების ჯანმრთელობის შტურმისგან და თავდამსხმელებისგან დაცვა გახდება საჭირო"

20 ივნისის აქცია

19-22 ივნისს ზაქარია ქუცნაშვილის ორგანიზებით თბილისში მართლმადიდებლობის საპარლამენტთაშორისო ასამბლეა უნდა გამართულიყო, რომლის ფარგლებში რუსი დეპუტატები საქართველოში ჩამოვიდნენ. 20 ივნისს ორგანიზაციის პრეზიდენტი, რუსი დეპუტატი სერგეი გავრილოვი ასამბლეის სესიის წაყვანისთვის პარლამენტში, ირაკლი კობახიძის სავარძელზე დაჯდა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს". ოპოზიციის პროტესტის შემდეგ ასამბლეა შეწყდა, ხოლო ზაქარია ქუცნაშვილმა განაცხადა, რომ დეპუტატის მანდატს დატოვებდა.

გავრილოვის მიერ სკამის დაკავებას საპროტესტო ტალღა მოჰყვა სამოქალაქო სექტორშიც. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი. შინაგან საქმეთა სამინისტრომ იმავეს ღამეს სხვადასხვა სამართალდარღვევისთვის ჯამში 305 ადამიანი დააკავა.