იუსტიციის უმაღლეს საბჭოსთან დამოუკიდებელი იურისტების ჯგუფი საპროტესტო აქციას მართავს. ისინი უზენაესი სასამართლოს მოსამართლეთა არჩევის პროცესს ბოიკოტს უცხადებენ და ამბობენ, რომ სასამართლოში მხოლოდ "მურუსიძე-ჩინჩალაძის კლანის" მიერ არჩეული წევრები მოხვდებიან.

"ჩვენ პარლამენტში შევიტანეთ რეზოლუცია, რომ პარლამენტმა აღიაროს სასმართლოში კლანური მმართველობა. ეს მმართველობა არის სიმსივნე, რომელიც ვითარდება, იზრდება, ფართოვდება...იმისთვის, რომ დღეს გახდე მოსამართლე კლანს უდნა აღუთქვა ერთგულება. აქ არიან ჭკვიანი და უსინდისო ადამიანები, რომლებიც მიიღებენ ნებისმიერ შეკვეთას", — თქვა აქციის ერთ-ერთმა მონაწილემ.

აქციის პარალელურად იუსტიციის უმაღლეს საბჭოში მოსამართლეთა შერჩევის პროცედურა მიმდინარეობს. ფარული კენჭისყრით უზენაესის სასამართლოს მოსამართლეობის 48 კანდიდატიდან საბჭო 20 მათგანს შეარჩევს. კენჭისყრის მეორე ეტაპზე სათითაოდ ეყრება კენჭი შერჩეულ 20 კანდიდატს, იმის გასარკვევად, უნდა წარედგინოს თუ არა მისი კანდიდატურა საქართველოს პარლამენტს. კანდიდატი წარდგენილად ჩაითვლება, თუ მას საბჭოს ღია სხდომაზე, ფარული კენჭისყრით მხარს დაუჭერს საბჭოს სრული შემადგენლობის არანაკლებ ორი მესამედი. ამის შემდეგ სია დასამტკიცებლად პარლამენტს გადაუგზავნება.