პარლამენტის წევრი ქართული ოცნებიდან ნინო წილოსანი აპირებს, რომ სამოქალაქო აქტივისტსა და ფლანგვის დეტექტორის მთავარ რედაქტორს, შოთა დიღმელაშვილს ცილისწამებისთვის სასამართლოში უჩივლოს.

როგორც წილოსანი ფეისბუქზე წერს, შოთა დიღმელაშვილმა #სირცხვილიას გადაცემაში ცრუ ინფორმაცია გაავრცელა იმის შესახებ, რომ დეპუტატი მფარველობს კომპანიას, რომელიც ქუთაისში სოციალურად დაუცველებისთვის სახლებს აშენებს. ეს კომპანია შპს სანოა, რომელსაც აუდიტის დასკვნის მიხედვით, არაერთი დარღვევა გამოუვლინდა.

კანონმდებელი კონკრეტული ზომების მიღებამდე სამოქალაქო აქტივისტისგან ინფორმაციის უარყოფასა და ბოდიშის მოხდას ითხოვს.

"ამ ნაბიჯს მხოლოდ ჩემი ინტერესების დასაცავად არ ვდგამ, ამ ქმედებით ყველა იმ მოქალაქეს ვცემ პატივს, ვინც მე ხმა მომცა და ნდობა გამომიცხადა", — წერს წილოსანი.

შოთა დიღმელაშვილი ამბობს, რომ ნინო წილოსანის მუქარა არის შეტევა სიტყვისა და გამოხატვის თავისუფლებაზე, რათა სამოქალაქო აქტივისტებმა სახელმწიფო შესყიდვებში არსებულ პრობლემებსა და საპარლამენტო ლობირებაზე არ ისაუბრონ.

მიმდინარე წლის მარტში სახელმწიფო აუდიტის სამსახურმა გამოაქვეყნა ანგარიში, რომლის მიხედვითაც 2016-2017 წლებში ქუთაისში სოციალური საცხოვრისი უხარისხოდ არის აშენებული და საცხოვრებელ ფუნქციებს ვერ ასრულებს. მათივე თქმით, კონკურსის პირობები ერთ კომპანიაზე, შპს სანოზე იყო მორგებული, ხოლო მერიამ საცხოვრისი არასაბაზრო ფასად შეისყიდა.

იგივე ინფორმაცია ფლანგვის დეტექტორმა თავის ფეისბუქგვერდზე გაავრცელა. ორგანიზაციის ინფორმაციით, შპს სანოს დამფუძნებელი და დირექტორი, ლევან ჭანტურიძე არაერთ ბიზნესში ნინო წილოსანის პარტნიორია.

მაცხოვრებლები რუსთავი 2-თან ყვებოდნენ, რომ შენობის კედლები თაბაშირ-მუყაოთია აშენებული და ფანჯრების გაღება მხოლოდ სკამის დახმარებითა შესაძლებელი.

ერთ-ერთი მაცხოვრებელი ირანდა ნემსიწვერიძე ყვებოდა, რომ საცხოვრისში ახალი შემოსული იყო, როდესაც სააბაზანოში ჭერი ჩამოვარდა. კიდევ ერთი მაცხოვრებელი მარინა სვანიძე ამბობდა, რომ გაზქურები ბინებში დახვდათ, თუმცა შენობაში გაზი გაყვანილი არაა. მისივე თქმით, ბუნებრივი აირის შეყვანა გამწოვების არარსებობის გამო ვერ ხერხდება.

შესწორება: თავდაპირველად მასალაში ეწერა, რომ ნინო წილოსანი შოთა დიღმელაშვილისგან ბოდიშის მოხდას სასამართლოს გზით ითხოვდა, თუმცა დაზუსტების შემდეგ ინფორმაცია ჩასწორდა.