ოცნების პრემიერ ირაკლი კობახიძის მიერ ტრამპის ადმინისტრაციისთვის გაგზავნილ ღია წერილს ოცნების დეპუტატი დავით მათიკაშვილი ეხმაურება. მისი თქმით, ჩნდება კითხვა, რატომ არ ექცევა სათანადო ყურადღება შეერთებული შტატების ახალი ადმინისტრაციისგან იმ ქვეყანას, რომელიც ჯო ბაიდენის ადმინისტრაციის მიერ უსამართლოდ იყო დაჩაგრული?

"შეერთებული შტატების საკანონმდებლო ორგანოს ქვედა პალატა იღებს დოკუმენტს, რომელსაც სრულიად ცინიკურად არქმევს "მეგობარ აქტს", სადაც საქართველოს, ქართველი ხალხის და მათ მიერ არჩეული ხელისუფლების წინააღმდეგ მტრული შინაარსია. ეს აქტი არის სრულიად დაცლილი რეალური ფაქტებისგან. მასში არსებული გარემოებები არასწორი და ტყუილია. ამ ყველაფრის ჭრილში ჩვენი ქვეყანა მოელის შეერთებული შტატებისგან, მისი ახალი ხელისუფლებისგან მკაფიო პოზიციას, მკაფიო ნაბიჯებს საქართველოსთან მიმართებით, იმ ქვეყანასთან მიმართებით, რომელმაც ათწლეულების განმავლობაში უზარმაზარი კონტრიბუცია შეიტანა შეერთებული შტატების და ნატო-ს ეგიდით წარმოებულ საომარ მისიებში. ქართველმა სამხედროებმა სიცოცხლე და ჯანმრთელობა შესწირეს ამ მისიებს და ერთ-ერთი ყველაზე დიდი კონტრიბუტორი, ნატო-ს წევრ ქვეყნებთან ერთად, იყო ჩვენი ქვეყანა სამხედროების რაოდენობის კუთხით. ამ პარტნიორული ურთიერთობის ჭრილში მოველით რეალურ ნაბიჯებს შეერთებული შტატებისგან. ეს ნაბიჯები რომ აგვიანებს, ცხადია, კითხვის ნიშნებს იწვევს. წერილი არის მკაფიოდ ჩამოყალიბებული და, ბუნებრივია, იქნება ძალიან კარგი და სასარგებლო დიპლომატიური ურთიერთობებისთვის, თუ ამ ყველაფერს სათანადო პასუხი გაეცემა", — განაცხადა დავით მათიკაშვილმა. კომენტარს "პირველი არხი" ავრცელებს.

ოცნების პრემიერი ირაკლი კობახიძე აშშ-ს პრეზიდენტს, დონალდ ტრამპს და აშშ-ს ვიცე-პრეზიდენტს, ჯეი დი ვანსს ღია წერილით მიმართავს. სადაც წერს, რომ ტრამპის ადმინისტრაციას რამდენიმე კვირის წინ წერილით მიმართეს ქართულ-ამერიკულ ურთიერთობებთან დაკავშირებით. თუმცა, პასუხი დღემდე არ მიუღიათ. კობახიძე იმასაც წერს, რომ ეს "დუმილი გასაკვირია ქართველი ხალხისთვის და საქართველოს ხელისუფლებისთვის".

ღია წერილში ოცნების პრემიერი ამერიკის კონგრესის მიერ მიღებულ "MEGOBARI აქტზეც" წერს და აღნიშნავს, რომ "MEGOBARI აქტს" არაერთი სუბიექტი მათ ადმინისტრაციას მიაწერს. ტრამპის ადმინისტრაციას კი ამ დრომდე ამ ყველაფერზე "კრიტიკული განცხადება არ გაუკეთებია.

ამას გარდა, კობახიძე წერს, რომ "USAID-ისა და NED-ის მიერ დატრენინგებული და დაფინანსებული 250-მდე ადამიანი დღემდე ყოველდღიურად იკრიბება ცენტრალურ გამზირზე, რაც იმის მტკიცებულებაა, რომ "დიფ სთეითს" რევოლუციის გეგმა თაროზე ჯერაც არ შემოუდია" და იმედოვნებს, რომ დონალდ ტრამპის დაპირება "დიფ სთეითთან" ბრძოლის შესახებ, გამარჯვებით დასრულდება, "რაც საფუძვლად დაედება ქართულ-ამერიკული ურთიერთობების გადატვირთვას და სტრატეგიული პარტნიორობის აღდგენას".