სანქცირებულმა შინაგან საქმეთა მინისტრის მოადგილემ, ალექსანდრე დარახველიძემ საკანონმდებლო პაკეტი წარადგინა. რომლის მიხედვითაც საპროტესტო აქციებში ჩართულ უცხოელებს "დესტრუქციული" ქმედებების საპასუხოდ ქვეყნიდან გააძევებენ. ამის შესახებ ალექსანდრე დარახველიძემ პარლამენტის პლენარულ სხდომაზე განაცხადა.

მისი თქმით, საკანონმდებლო პაკეტი მათ საშუალებას მისცემს, რომ ქვეყნიდან გააძევონ ის უცხოელები, რომლებიც შეკრება-მანიფესტაციებთან დაკავშირებულ წესებს დაარღვევენ ან წვრილმან ხულიგნობას ჩაიდენენ.

"ამ პირების გარკვეული რაოდენობა ქვეყანაში აქციების წინა დღეებში შემოვიდა. ეს ფაქტი შეიძლება დამატებითი კითხვის ნიშნებს აჩენდეს. ეს ადამიანები გარკვეულ პირებს დესტრუქციული ქმედებებისკენ აქტიურად მოუწოდებდნენ. ორგანიზაციული ნაწილი რომ გამოკვეთილიყო, მათ მიმართ სისხლის სამართლის პასუხისმგებლობაც დადგებოდა. დიდია იმ ქვეყნების ჩამონათვალი, ვისი მოქალაქეებიც აქციებში იყვნენ ჩართული. მას შემდეგ, რაც სახელმწიფომ კონკრეტული პირების დაკავება და ადმინისტრაციული სანქციების გამოყენება დაიწყო, ეს რიცხვი მნიშვნელოვნად შემცირდა.

სამწუხაროდ, საქმეს ართულებდა ის, რომ იმის მიუხედავად, რომ კონკრეტული პირების მიმართ 10-15 დღიანი ადმინისტრაციული პატიმრობის გამოყენება მოხდა, მათ საქართველოში უვიზოდ დარჩენის ერთწლიანი ვადა ჰქონდათ. შესაბამისად, ამ ადამიანების მიმართ გაძევების პროცედურა ვერ დავიწყეთ.

იყო შემთხვევა, როცა უცხო ქვეყნის მოქალაქეებმა ანჩისხატის ეკლესიას კვერცხები დაუშინეს, რამაც საზოგადოებაში დიდი აგრესია გამოიწვია.

ადმინისტრაციული კუთხით მნიშვნელოვანია ისეთი დარღვევები როგორიცაა წვრილმანი ხულიგნობა, პოლიციის დაუმორჩილებლობა, შეკრება-მანიფესტაციების წესის დარღვევა. ეს ის შემთხვევებია, რასაც აქციის მონაწილეები პოლიციის და სახელმწიფოს მიმართ იყენებენ. ასე რომ, თუ ჩვენ ეფექტური მექანიზმები გვექნება, დესტრუქციული ქმედებებს პასუხს გავცემთ. ეს აქციებში მსგავსი ძალების ჩართვის პრევენციას შეუწყობს ხელს", — განაცხადა ალექსანდრე დარახველიძემ პარლამენტის პლენარულ სხდომაზე (კომენტარს IPN ავრცელებს).

შეგახსენებთ, 2024 წლის 19 დეკემბერს დიდმა ბრიტანეთმა პოლიციის მაღალჩინოსნები, მათ შორის შს მინისტრი ვახტანგ გომელაური და კიდევ 4 პირი — შს მინისტრის მოადგილე ალექსანდრე დარახველიძე, თბილისის პოლიციის დეპარტამენტის უფროსი სულხან თამაზაშვილი, განსაკუთრებულ დავალებათა დეპარტამენტის უფროსი ზვიად ხარაზიშვილი ("ხარება") და მისი მოადგილე მილერი ლაგაზაური დაასანქცირა.