საქართველოს მე-5 პრეზიდენტმა, სალომე ზურაბიშვილმა ბრიფინგზე ისაუბრა ყოფილი პროკურორის, ოთარ ფარცხალაძეს რუსეთში 9 მაისის აღლუმის დასწრებაზე. ზურაბიშვილის განცხადებით, ის არგუმენტი, რასაც ოცნების წარმომადგენლები იყენებენ სანქციებზე საუბრისას, რომ არ არსებობს ფარცხალაძეს კავშირი რუსეთთან — 9 მაისის ამ ვიზიტით გამოიაშკარავა თავი.

"გამაოგნებელი საკითხია ის რეაქციები, რბილად ვიტყოდი, მსუბუქი რეაქციები, რაც მოჰყვა იმას, რომ ქვეყნის ყოფილი გენერალური პროკურორი დგას წითელ მოედანზე... ის ადამიანები, რომლებიც გუშინ ამბობდნენ, ლაპარაკია ქართული ოცნების ყველა ლიდერზე, რომლებიც გუშინ ამბობდნენ, რომ დასანქცირებაზე ვერაფერს ვერ იტყოდნენ და პირიქით, უნდა დაეცვათ ფარცხალაძე სანქციებისგან, იმიტომ, რომ მტკიცებულებები არ არსებობდა, დღეს, როცა მტკიცებულება კი არა, გამოაშკარავებაა მისი როლის და მისი მოღალატეობრივი საქმიანობის ისეთი, რომ მეტი არ შეიძლება - თურმე დღეს აღარ იციან მტკიცებულებები აქვთ თუ არ აქვთ და ერიდებიან პასუხს და პასუხისმგებლობას," — განაცხადა საქართველოს მე-5 პრეზიდენტმა, სალომე ზურაბიშვილმა.


ცნობისთვის, ტვ პირველის ინფორმაციით, საქართველოს ყოფილი გენერალური პროკურორი, აშშ-ის მიერ რუსეთის ფედერაციის ეკონომიკის მენეჯმენტის საკონსულტაციო სექტორში საქმიანობისა და FSB-სთან კავშირის გამო სანქცირებული ოთარ ფარცხალაძე 9 მაისს წითელ მოედანზე იყო, სადაც რუსეთმა "გამარჯვების დღე" აღნიშნა. გავრცელებულ კადრებში ჩანს, რომ ფარცხალაძე წითელ მოედანზე პრორუს მამუკა ფიფიასთან ერთად არის. მამუკა ფიფიაა ის პირი, რომელმაც დააინიციირა "გეორგიევსკის ტრაქტატის" აღდგენის იდეა.

ზურაბიშვილმა ასევე ისაუბრა აქტივისტ ქალებზე თავდასხმაზე. მისი განცხადებით, სანამ ოცნების წარმომადგენლები წმინდა ანდრია პირველწოდებულის ხსენების დღეს ეკლესიაში "უზარმაზარი სანთლებით" აღნიშნავდნენ, ამ დროს ქალებზე ბარბაროსული გზებით ძალადობენ.

"ეს არის იმის ნიშანი, რომ მათ ცივილიზებული ფორმები დაკარგული აქვთ. ეს მიუღებელია ჩვენი საზოგადოებისთვის, ჩვენი ტრადიციებისთვის. ისინი დადიან ეკლესიაში, უჭირავთ უზარმაზარი სანთლები და ამ დროს სრულიად უდანაშაულო ქალების წინააღმდეგ მიდის ასეთი ბარბაროსობა. ეს შეიძლება მათ უკან მოუბრუნდეთ და ქვეყანა უმართავი გახდეს. ჩვენ ყველამ უნდა დავიცვათ ჩვენი შვილების მომავალი," — განაცხადა ზურაბიშვილმა.