ცხრასაათიანი კურიერის წამყვანებმა, დიანა ჯოჯუამ და მიშა სესიაშვილმა რუსთავი 2 დატოვეს. გამოსამშვიდობებელი სიტყვების შემდეგ ცხრასაათიანი კურიერი დასრულდა.

"რუსთავი ორი არ არის ლოგო, ეს იყო ჩვენი ცხოვრება და როგორც ნოდარ მელაძემ თავის ერთ-ერთ ბოლო ეთერში თქვა - თავისუფლების ტერიტორია. ეს არხი ადამიანებია, პროფესიონალი და ერთგული ადამიანების ერთობა. ყველას წარმატებას ვუსურვებ, მათ შორის მათ, ვისაც ჯერ კიდევ სჯერა, რომ ბიძინა ივანიშვილის ტელევიზიაში შეინარჩუნებს თავისუფლებას. მე, დიანა ჯოჯუა, აფხაზეთიდან კრემლის მიერ გამოგდებული, ვერც ერთი მიზეზით, ვერანაირი დაშვებით, ვერავითარი გამართლებით ვერ დავჯდები იმ ეთერში, რომელიც ამ ქვეყანაში კრემლის მთავარი მოსამსახურის, ბიძინა ივანიშვილისაა. დღეს მე იძულებული ვარ, გითხრათ "ნახვამდის", — განაცხადა ჯოჯუამ გამოსამშვიდობებელ სიტყვაში.

მიშა სესიაშვილმა კი განაცხადა, რომ რუსთავი 2-ზე ტოტალური წმენდა დაიწყო:

"წითელი ხაზები გადაკვეთილია... ეს ჩემთვისაც დასასრულია, დასასრული ისეთი რუსთავი 2-ის, რომელიც მიყვარდა და რომელსაც აფასებდა მაყურებელი. 12 წლის განმავლობაში ვმუშაობდი გუნდთან, რომელიც გაცილებით მეტი იყო, ვიდრე სამსახური, რომელიც იყო ოჯახი, ერთი იდეის გარშემო გაერთიანებული ადამიანების ერთობა, ბრძოლაში გამოწრთობილი ადამიანების ერთობა, რომელიც ქმნიდა თავისუფალ სივრცეს ამ ქვეყანაში და საუკეთესო სატელევიზიო პროდუქტს. მე დღეს ვტოვებ რუსთავი 2-ს, მაგრამ ვიტოვებ იმედს, რომ ისევ შევხვდებით. ბრძოლა გრძელდება უკეთესი მომავლისთვის, თავისუფალი საქართველოსთვის".

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს: გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.