ინდოეთის პარლამენტმა მხარი დაუჭირა კანონპროექტს, რომლის მიხედვითაც სიტყვიერად მომენტალურ განქორწინება სისხლისსამართლებრივი დანაშაული გახდა. გადაწყვეტილება ისტორიულია, რადგან წლებია ინდოელი ქალები ამ წესის კანონით აკრძალვას ითხოვენ. ინდოეთის უზენაესმა სასამართლომ ეს მრავალსაუკუნოვანი პრაქტიკა არაკონსტიტუციურად ჯერ კიდევ 2017 წელს სცნო.

ე.წ. სამმაგი ტალაკი ქმარს უფლებას აძლევდა, რომ სიტყვა ტალაკის (განქორწინების) სამჯერ წარმოთქმის შემთხვევაში ცოლს იმავე მომენტში განქორწინებოდა. ამავე დროს, ქმარს შეეძლოა ტალაკი ზეპირად ეთქვა ან ცოლისთვის მესიჯად გაეგზავნა.

ახალი კანონით, კაცებს, რომლებიც სამმაგ ტალაკს გამოიყენებენ, სამ წლამდე თავისუფლების აღკვეთა მიესაჯებათ. კანონპროექტის მომხრეები ამბობენ, რომ ახალი ნორმა მუსლიმ ქალებს დაიცავს. ოპონენტები კი აღნიშნავენ, რომ სასჯელი მკაცრია და შესაძლოა, ბოროტად იქნას გამოყენებული.

ინდოეთის პარლამენტში კანონპროექტი პირველად 2017 წელს შეიტანეს, თუმცა მისი განხილვა ზედა პალატაში შეჩერდა, რადგან დეპუტატების ნაწილმა მას უსამართლო უწოდა. ინდოეთის მმართველი პარტია პროექტს მხარს უჭერს, ხოლო მთავარი ოპოზიციური ძალა მის წინააღმდეგ გამოდის.

ქვეყნის პრემიერ-მინისტრმა, ნარენდრა მოდიმ განაცხადა, რომ კანონის მიღებით "გენდერულმა სამართლიანობამ გაიმარჯვა". ოპოზიცია კი ხელისუფლებას მუსლიმებზე თავდასხმაში ადანაშაულებს.

მუსლიმებში სამმაგი ტალაკი განქორწინების საკმაოდ გავრცელებული ფორმაა. იყო შემთხვევები, როდესაც ცოლები განქორწინების შესახებ იგებდნენ WhatsApp-ში ან Skype-ში გაგზავნილი შეტყობინებით. სამმაგი ტალაკი, როგორც განქორწინების ფორმა შარიათის კანონებსა და ყურანში ნახსენები არაა, თუმცა ეს პრაქტიკა ათწლეულებია რაც არსებობს. ისლამური ქვეყნების ნაწილმა, მათ შორის ეგვიპტემ, პაკისტანმა და ბაგლადეშმა სამმაგი ტალაკი კანონით აკრძალეს.