ანანურის არქიტექტურული კომპლექსის დაზიანების გამო, კონკრეტულ უბნებზე ვიზიტორებისთვის შეზღუდვები დაწესდება. ამის შესახებ ინფორმაცია საქართველოს კულტურული მემკვიდრეობის სააგენტომ გაავრცელა.

ანანურის სამონასტრო კომპლექსის დაზიანების ამსახველი ფოტო და ვიდეომასალა თავდაპირველად საყდრისის კომიტეტის წევრებმა გაავრცელეს. მათი ცნობით, განსაკუთრებით მძიმე მდგომარეობაშია გალავანი, ქონგურები და კოშკების სახურავები.

ფოტო: ნინო ბურჭულაძე / საყდრისის კომიტეტი

ფოტო: ნინო ბურჭულაძე / საყდრისის კომიტეყი

ფოტო: ნინო ბურჭულაძე / საყდრისის კომიტეყი

კომიტეტში აცხადებენ, რომ ტურისტების და ადგილობრივი დამთვალიერებლის ნაკადი, გალავანზე უმისამართოდ დადის და კედლებს აზიანებს. მათივე თქმით, ტერიტორიაზე არ არის მინიშნებები, გიდები ტურისტებს არ უკრძალავენ გალავანზე ფოტოების გადაღებას და ასვლას, რაც კედელს აზიანებს, არ არის ჯებირები.

ამის გათვალისწინებით, საყდრისის კომიტეტმა ანანურის სამონასტრო კომპლექსის ტერიტორიაზე ტურისტებისთვის რეგულაციების ამოქმედება მოითხოვა.

ფოტო: ნინო ბურჭულაძე / საყდრისის კომიტეტი

ფოტო: ნინო ბურჭულაძე / საყდრისის კომიტეტი

ფრესკები ღვთაების ეკლესიიდან, რომელიც დაკეტილია და წყალიც ჟონავს

ფოტო: ნინო ბურჭულაძე / საყდრისის კომიტეტი

კულტურული მემკვიდრეობის სააგენტოსა ცნობით, ტერიტორიაზე არსებულ მდგომარეობასთან დაკავშირებით შეიქმნა უწყებათაშორისი სამუშაო ჯგუფი, რომელიც კომპლექსზე არსებული ვითარების გამოსასწორებლად სამოქმედო გეგმას განსაზღვრავს.

მათივე ცნობით, იგეგმება სამონასტრო კომპლექსის რეაბილიტაცია და ინფრასტრუქტური მოწყობა.

"არსებული გარემოებიდან გამომდინარე, დროებითი ღონისძიებებით ანანურის არქიტექტურული კომპლექსის ტერიტორიაზე აღიკვეთება ვიზიტორთა ჯგუფების უკონტროლო ქმედებები, რაც უპირველესად უსაფრთხოების ნორმების უზრუნველყოფითა და ძეგლთა დაცვითი პრინციპებით იქნება ნაკარნახევი. პრევენციული გადაწყვეტილებების შედეგად გამოირიცხება ვიზიტორთა ჯგუფების მიერ არქიტექტურული კომპლექსის ცალკეული სტრუქტურული სეგმენტების მექანიკური დაზიანებების ალბათობა და გამოუსწორებელი ხარვეზების შექმნის რისკი", — ნათქვამია სააგენტოს განცხადებაში.