საქართველოს ადგილობრივ თვითმმართველობათა ეროვნული ასოციაციის (ათეა) პრეზიდენტად კვლავ თბილისის მერი კახა კალაძე აირჩიეს.

ათეა-ს ეროვნული ასამბლეის რიგით მე-8 სხდომაზე თბილისის მერმა შეკრებილებს სიტყვით მიმართა და მათ ამ მიმართულებით გასული ოთხი წლის განმავლობაში განხორციელებული საქმიანობის ანგარიში გააცნო.

"მინდა, კიდევ ერთხელ ვისარგებლო შემთხვევით და ყველას მოგილოცოთ 2025 წლის თვითმმართველობის არჩევნებში დამსახურებული გამარჯვება, რომლის უკანაც დგას დიდი შრომა, განხორციელებული მასშტაბური პროექტები და ხედვა, თუ როგორ უნდა შევქმნათ ჩვენს მუნიციპალიტეტებში უფრო კომფორტული, მიმზიდველი, ჯანსაღი და ღირსეული გარემო მოსახლეობისთვის. მიღწეული შედეგები, აგრეთვე ის მხარდაჭერა, რომელსაც ადგილობრივი ხელისუფლება უწევს მოქალაქეებს, ნათლად წარმოაჩენს, თუ რაოდენ მნიშვნელოვანია ქვეყანაში ძლიერი თვითმმართველობის არსებობა. ადგილობრივი არჩევნები წარმოადგენს თვითმმართველობის განვითარების მორიგ ეტაპს. ახლად არჩეული ადგილობრივი ხელისუფლების პასუხისმგებლობაა, იზრუნოს თვითმმართველობის ინსტიტუციურ გაძლიერებაზე, რადგანაც ძლიერი თვითმმართველობა ჩვენი ქვეყნის წარმატების საწინდარია. ამ მიზნების მისაღწევად საქართველოს ადგილობრივ თვითმმართველობათა ეროვნული ასოციაცია ერთგვარი ინსტრუმენტია ადგილობრივი ხელისუფლების ხელში", — განაცხადა კახა კალაძემ.

დედაქალაქის მერმა აღნიშნა, რომ გასული ოთხი წლის განმავლობაში, ასოციაცია აქტიურად ახორციელებდა სტრატეგიულ და პრაქტიკულ ღონისძიებებს ქალისა და მამაკაცის თანასწორობის უზრუნველსაყოფად. კერძოდ, 2023 წელს ასოციაციაში ჩამოყალიბდა ადამიანის უფლებათა დაცვის ლოკალიზების კომიტეტი, რომელმაც მნიშვნელოვანი ღონისძიებები განახორციელა ადამიანის უფლებათა დაცვის სფეროში; 2024 წელს დაფუძნდა რეგიონული პლატფორმები, რომლებიც აერთიანებენ კონკრეტულ რეგიონში მდებარე მუნიციპალიტეტებს; ამავე წელს შეიქმნა მაღალმთიანი რეგიონებისა და თვითმმართველი ქალაქების თემატური ჯგუფები; 2022 წელს ათეა გახდა გაერთიანებული ქალაქებისა და ადგილობრივ ხელისუფლებათა მსოფლიო ორგანიზაციის (UCLG) ევროპული სექციის წევრი.

ინფორმაციას თბილისის მერია ავრცელებს.