ქართული ოცნების თავმჯდომარეს, ბიძინა ივანიშვილს მიაჩნია, რომ რუსული ბაზრის დაკეტვისა და ვაჭრობის შეწყვეტის მსურველები ქვეყნის მტრები არიან. ამავე დროს, ის ამბობს, რომ რუსული ბაზარი ევროპულითა და უკრაინულით უნდა ჩანაცვლდეს.

როგორც მმართველი პარტიის თავმჯდომარემ ჟურნალისტებს უთხრა, რუსულ ბაზარზე დამკვიდრებას ევროპის განვითარებული ქვეყნებიც ცდილობენ.

"რუსული ბაზრის ჩანაცვლება არაა მარტივი არავისთვის, მით უმეტეს ჩვენთვის, რადგან პროდუქციის შეტანა და მასზე მომხმარებლის მიქცევა არ არის მარტივი, ამას სჭირდება წლები. ჩვენი პროდუქცია ცნობილია რუსეთში და მას ჰყავს მომხმარებელი. დივერსიფიკაცია მოხდა წლების განმავლობაში როდესაც დაკეტილი იყო ბაზარი და ეს დღესაც გრძელდება", — განაცხადა ივანიშვილმა.

2008 წლის აგვისტოს ომის დროს საქართველოს ტერიტორიების ოკუპაციაში ივანიშვილმა ისევ მაშინდელი ხელისუფლება, ნაციონალური მოძრაობა დაადანაშაულა.

"რომ არა ამათი დაუდევრობა, ამათი ღალატი, ამათი ქცევა, რუსის ჯარი ვერ შემოვიდოდა საქართველოში 2008 წელს. არ იფიქროთ, რომ ვამართლებ რუსის ჯარის შემოსვლას. ჩვენ ყველანი ქართული ოცნებიდან ვიყენებთ ტერმინოლოგიას, რომ ოკუპირებულია საქართველოს 20 პროცენტი. მაგრამ ჩვენ ჩვენები უნდა გავასამართლოთ. დღეს, რომ გულზე იხატავენ "არა ოკუპაციას" ვის ეუბნებიან ესენი. მათ მოახერხეს ეს ოკუპირება", — აღნიშნა ივანიშვილმა.

ივანიშვილს მიაჩნია, რომ ქვეყანაში რუსი ტურისტების ჩამოსვლა და სავაჭრო ურთიერთოების ქონა პოლიტიკოსების დაშვებული შეცდომების გამოსწორების საფუძველია.