ჩერნობილის ატომური ელექტროსადგურის მეოთხე რეაქტორის ახალი სარკოფაგი ექსპლუატაციაში შევიდა. სარკოფაგი ავარიული ბლოკის უსაფრთხოებას 100 წლის განმავლობაში უზრუნველყოფს.

კონსტრუქციას თაღის ფორმა აქვს, რომლის სიგრძე 160 მეტრია. სარკოფაგი 109 მეტრი სიმაღლისაა, ხოლო სიგანეში 257 მეტრია. კონსტრუქცია 31 ათას ტონას იწონის. მასზე მუშაობა 2008 წელს დაიწყეს და იმედოვნებდნენ, რომ 2017 წელს დასრულდებოდა, თუმცა ვადებმა გადაიწია.

პროექტის საერთო ღირებულება 1,5 მილიარდია ევროა. მშენებლობას აწარმოებდა საერთაშორისო ფონდი თავშესაფარი, რომელიც დიდი შვიდეულის ქვეყნების ინიციატივით შეიქმნა და ევროპის რეკონსტრუქციისა და განვითარების ბანკი ხელმძღვანელობდა. თვითონ ბანკმა ფონდში 700 მილიონი ევრო გადარიცხა, დანარჩენი თანხა კი 40-ზე მეტი ქვეყნის შემოწირულობით მოგროვდა. ევროკავშირმა მშენებლობისთვის 431 მილიონი ევრო გადარიცხა.

აქამდე მეოთხე ენერგობლოკიდან რადიოაქტიური ნივთიერებების გამოდევნას 1986 წელს აშენებული სარკოფაგი იცავდა. მისი ექსპლუატაციის ვადა 20 წელი იყო, თუმცა კონსტრუქციის არაერთი გამაგრების შემდეგ ვადა 2023 წლამდე გახანგრძლივდა. სარკოფაგის მთავარი ნაკლი არაჰერმეტულობა იყო.

1986 წელს ჩერნობილის ატომურ ელექტროსადგურზე აფეთქების შედეგად გარემოში 400-ჯერ მეტი რადიაცია გაიფანტა, ვიდრე ჰიროსიმაში ატომური ბომბის აფეთქებისას. ავარიამ დიდი გავლენა იქონია როგორც ადამიანებზე, ისე ბუნებაზე. დაზარალებულთა ზუსტი რიცხვი დღემდე უცნობია. გაეროს მონაცემებით, უშუალოდ ავარიის დროს 50 ადამიანი დაიღუპა, ხოლო დასხივების შემდგომ პერიოდში — 4 000 ადამიანი. გაურკვეველია, რადიაციამ პირდაპირ თუ ირიბად რამდენი ადამიანი იმსხვერპლა.

ამასთანავე, მნიშვნელოვანი ზიანი მიადგა გარემოს. ერთ-ერთი მონაკვეთი, რომელზეც რადიაციამ განსაკუთრებული გავლენა იქონია, ფიჭვნარის ტყეა, რომელიც მას შემდეგ წითელი ტყის სახელითაა ცნობილი. ამ მონაკვეთმა რადიაციის მაღალი დოზა მიიღო, ხეები გახმა და ფოთლები გაწითლდა. ატომურ კატასტროფას ცხოველების უდიდესი ნაწილი ვერ გადაურჩა.

ამავე თემაზე: