გულწრფელად რომ ვთქვათ, 5-დღიანი სამუშაო კვირა დიდად არავის ეხატება გულზე. მაგრამ თუ ნაკლები მუშაობისთვის გამამართლებელ მიზეზს ეძებთ, მეცნიერება თქვენ მხარესაა; ყოველ შემთხვევაში მაშინ მაინც, თუ 40 წელს გადაცილებული ხართ.

მელბურნის ინსტიტუტის სამეცნიერო ჟურნალში, Melbourne Institute Worker Paper, გამოქვეყნებული ანგარიშის თანახმად, 40 წელს გადაცილებული პირები ყველაზე პროდუქტიულები მაშინ არიან, როცა კვირაში სამი ან ნაკლები დღით მუშაობენ.

გამოცემა Newser განმარტავს, რომ მკვლევარები ამ დასკვნამდე 3000 კაც და 3500 ქალ მოხალისეზე დაკვირვების შედეგად მივიდნენ. მეცნიერებმა მონაწილეებს კოგნიტური ტესტების შევსება დაავალეს, რომლებზე დაყრდნობითაც თითოეულის შრომითი ჩვევები, მეხსიერება და ორგანიზაციული და აბსტრაქტული აზროვნების უნარები გააანალიზეს.

კოგნიტური ტესტები მოხალისეებს უკუღმა კითხვას, სიტყვების ხმამაღლა წაკითხვასა და შეზღუდულ დროში ციფრების ასო-ბგერებთან დაკავშირებას სთხოვდა. მონაწილეების კოგნიტური შესაძლებლობები გაუმჯობესდა, როცა მათი სამუშაო დრო მკვლევარებმა 25 საათამდე გაზარდეს. თუმცა, 25 საათის შემდეგ მათ შენიშნეს, რომ აღნიშნულმა მაჩვენებელმა - როგორც კაცებში, ისე ქალ მოხალისეებში - გაუარესება დაიწყო.

კვლევის შედეგთაგან ყველაზე მოულოდნელი, სავარაუდოდ, ის იყო, რომ მოხალისეებმა, რომელთაც კვირაში 55 საათით მუშაობა ევალებოდათ, პენსიონერებსა და უმუშევრებთან შედარებით დაბალი კოგნიტური შედეგები აჩვენეს.

"ბევრი ქვეყანა საპენსიო ასაკის გაზრდას აპირებს და იმ ასაკობრივ ზღვარს სწევს მაღლა, რომელიც საპენსიო სარგებლის მიღებაზეა დაწესებული. ეს კი ნიშნავს, რომ სულ მეტი ადამიანი განაგრძობს ცხოვრების გვიანდელ ეტაპებამდე მუშაობას", - განაცხადა მოხსენების თანაავტორმა, კეიოს უნივერსიტეტის პროფესორმა, კოლინ მაკენზიმ, - "ინტელექტუალური სტიმულაციის ხარისხი შეიძლება, რომ სამუშაო საათების რაოდენობამაც განსაზღვროს. მუშაობა ორლესური მახვილივითაა - მას, ერთი მხრივ, ტვინის აქტივობის სტიმულირება შეუძლია, მაგრამ, ამავდროულად, ხანგრძლივმა სამუშაო საათებმა, შესაძლოა, გადაღლა და სტრესი გამოიწვიოს, რასაც პოტენციურად კოგნიტური ფუნქციების დაზიანება შეუძლია".

მაკენზის თქმითვე, მათ კვლევაში ხაზგასმულია, რომ "სამუშაო საათებში განსხვავება მნიშვნელოვანია შუახნისა და ხანშიშესულ პირებში კოგნიტური ფუნქციების შესანარჩუნებლად" და რომ ნახევარ განაკვეთზე მუშაობა, შესაძლოა, "კოგნიტური ფუნქციების შენარჩუნებისათვის ეფექტიანი აღმოჩნდეს".

ასე რომ, თქვენივე ჯანმრთელობისთვის, გთხოვთ, ამდენსაც ნუ იმუშავებთ!