გიორგი სულაშვილი, ბიჭი რომელმაც აქციის დაშლის დროს თვალი დაკარგა 20 ივნისის ღამეს იხსენებს და ამბობს, რომ იქ მხოლოდ ქვეყნის სიყვარულის გამო იდგა:

"ქართველობის გამო ვიყავი იქ იმიტომ, რომ ქართველი ვარ და ყველაფერზე შემტკივა გული აბსოლუტურად... რუსეთი ოკუპანტია და ყოველთვის ვიტყვი მთელი ჩემი სიცოცხლის განმავლობაში. მეორე თვალიც რომ არ მქონდეს, მაგ აზრზე ვიქნები. რუსეთი არის დამპყრობელი და საქართველო უნდა იყოს რუსეთის გარეშე. ჩვენი ბოლო ომი ყოფილიყოს რუსეთთან და სხვებს აღარ გამოეცადოთ ასეთი სიმწარე, რაც მე და მაკომ [გომურმა] გამოვცადეთ", — ამბობს ის ტელეარხ მესამესთან ინტერვიუში.

გიორგი სულაშვილი იხსენებს იმ მომენტსაც, როდესაც თვალში რეზინის ტყვია მოხვდა:

"ვიდექი პარლამენტის კიბეებთან გვერდზე და გვერდიდანვე მესროლეს. გასროლის ხმა გავიგონე და ეგრევე მომხვდა. ეს არ იყო შემთხვევით ნასროლი, ეს იყო გამიზნულად გასროლილი. ელოდებოდნენ და მესროლეს".

გიორგი ამბობს, რომ თვალის დაკარგვასთან ერთად სახის ძვლებიც დაუზიანდა და ახლა იმპლანტები უდევს.

20 ივნისის აქციის დროს სპეცრაზმის მიერ ნასროლი რეზინის ტყვიის შედეგად თვალი დაკარგა 18 წლის მაკო გომურმაც. იგი საავადმყოფოდან 24 ივნისს გაწერეს. იგი მიუნხენის საუნივერსიტეტო კლინიკაში გაემგზავრა სამკურნალოდ.

აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.

გაიგეთ მეტი: