თბილისი პრაიდის ორგანიზატორების განცხადებით, "მიუხედავად არსებული რისკებისა, საქართველოს ისტორიაში პირველი ღირსების მარში" მაინც ჩატარდება. ამის შესახებ მათ გავრცელებულ განცხადებაშია ნათქვამი.

აქტივისტების განცხადებით, ხელისუფლებამ კიდევ ერთხელ აჩვენა, რომ არ არსებობს პოლიტიკური ნება ქვეყანაში სიძულვილის აღოსაფხვრელად. მათი თქმით, მთავრობის რეაგირება სიძულვილის ჯგუფების წინააღმდეგ არაეფექტურია.

"საფრთხეშია საქართველოს სახელმწიფოებრიობა და ინსტიტუციები. სწორედ ამიტომ, ჩვენ გავდივართ! გავდივართ, რათა ვაიძულოთ ხელისუფლება დაიცვას ადამიანის უფლებები და შეასრულოს ქვეყნის კონსტიტუციით აღებული ვალდებულებები. გავდივართ, რათა კიდევ ერთხელ გავაჟღეროთ ლესბოსელი, გეი, ბისექსუალი, ტრანსგენდერი და ქვიარ ადამიანების წინაშე მდგარი გამოწვევები", — წერია განცხადებაში.

თბილისი პრაიდის გუნდი ამბობს, რომ დაგეგმილ საჯარო მსვლელობაში მონაწილეობას მიიღებენ საერთაშორისო ორგანიზაციებისა და დიპლომატიური კორპუსის წარმომადგენლობები, მხარდამჭერი ჯგუფები, ოჯახის წევრები, მეგობრები. ასევე, ევროკავშირისა და მეზობელი სახელმწიფოების მოქალაქეები. ისინი მოუწოდებენ ყველას, სექსუალური ორიენტაციისა და გენდერული იდენტობის მიუხედავად შეუერთდნენ მათ.

თბილისი პრაიდის მოწინააღმდეგეები და ძალადობრივი მოწოდებები

თბილისი პრაიდს ჩაშლითა და აქტივისტებს დარბევით, სხვადასხვა ჰომოფობიური და ძალადობრივი ჯგუფი, მათ შორის, ლევან ვასაძის მხარდამჭერები, მართლმადიდებელ მშობელთა კავშირი და ქართული მარში ემუქრება.

პრაიდმა უსაფრთხოების საკითხზე მოლაპარაკებები შინაგან საქმეთა სამინისტროსთან რამდენიმე თვის წინ დაიწყო. მოლაპარაკებების დასასრულს საორგანიზაციო ჯგუფმა განაცხადა, რომ შსს-მ მათ დახურული სივრცე შესთავაზა ღირსების მარშისთვის, რასაც არ დათანხმდნენ. სამართალდამცავი უწყება ამბობდა, რომ სხვაგან მათ უსაფრთხოებას ვერ დაიცავს.

რამდენიმე დღის წინ საპატრიარქომ ოფიციალური განცხადებით მოსთხოვა მთავრობას, რომ არ დაუშვან თბილისი პრაიდის ჩატარება. ამ განცხადების გასაპროტესტებლად და სახელმწიფოსგან პოზიციის დაფიქსირების მოთხოვნით, პრაიდის ორგანიზატორებმა და მხარდამჭერებმა მათვრობის სახლთან აქცია დაგეგმეს, თუმცა ძალადობრივმა ჯგუფებმა კანცელარიასთან არ მიუშვეს. პროტესტმა კანცელარიის კიბეებზე გადაინაცვლა, სადაც მათ რამდენიმე საათის განმავლობაში აყენებდნენ შეურაცხყოფას, აგინებდნენ და ემუქრებოდნენ.

შედეგად პოლიციამ 28 პირი დააკავა, თბილისი პრაიდის საორგანიზაციო ჯგუფი კი შსს-თან მოლაპარაკებებზე დაბრუნდა.

აქციისა და კონტრაქციის მეორე დღეს ბიზნესმენმა, ლევან ვასაძემ ძალადობრივი განცხადებით, მხარდამჭერებს მოუწოდა ერთად იბრძოლონ პრაიდის წინააღმდეგ. ვერის ბაღში "ნამდვილი კაცების შეხვედრაზე" მან სახალხო რაზმების შექმნა დააანონსა. აქციის შემდეგ მოხალისეები, მათ შორის დეპუტატი ემზარ კვიციანი ჩაეწერენ რაზმში, რომელიც მიზნად პოლიციის კორდონების გარღვევას, სამმართველოებიდან მხარდამჭერების ძალით გამოყვანას, ლგბტ პირების ყურის აწევას, ხელების ქამრით შეკვრას, კომბლით გალახვას და სხვა სახის ძალადობებს ისახავდა მიზნად. ვასაძის თქმით, ლეგიონი პატრულირებას პრაიდის კვირეულში დაიწყებდა.

პრაიდმა ისევე, როგორც არასამთავრობო ორგანიზაციებმა, ოპოზიციამ, სახალხო დამცველმა მოუწოდეს შსს-ს ძალადობრივ განცხადებებზე რეაგირება ჰქონოდა. აქციიდან მეორე დღეს შსს-მ გამოძიება დაიწყო უკანონო დაჯგუფების შექმნის მუხლით.

პრაიდის საორგანიზაციო ჯგუფისა და შსს-ს შორის მოლაპარაკებები უშედეგო აღმოჩნდა. სახალხო დამცველის ნინო ლომჯარიას თქმით, უწყებამ ლგბტ თემის წარმომადგენლებს შესთავაზა, რომ თბილისი პრაიდი არ ჩატარდეს, რადგან უსაფრთხოების სერიოზულ რისკებთანაა დაკავშირებული. მისივე თქმით, შსს აცხადებდა, რომ ამ შემთხვევაში საუბარია არა მხოლოდ პრაიდის წევრების, არამედ ზოგადად უსაფრთხოებაზე.

შეხვედრის შემდეგ საორგანიზაციო ჯგუფს არ დაუფიქსირებია ოფიციალური პოზიცია, გადაიფიქრა თუ არა თბილისი პრაიდის ჩატარება. ამის ფონზე ლევან ვასაძე გამოვიდა და განაცხადა, რომ შსს-ს "სიტყვაზე ენდო" და პატრულირება გააუქმა. მაგრამ მანვე ხაზგასმით აღნიშნა, რომ ლეგიონი რჩებოდა და თუ ღირსების მარში ჩატარდებოდა აუცილებლად გამოვიდოდნენ გარეთ.

დღეს, 18 ივნისს ვასაძემ განაცხადა, რომ აქვს ინფორმაცია პრაიდის ჩატარის შესახებ, ამიტომ მხარდამჭერებს ისევ სრული მობილიზებისაკენ მოუწოდა. ის ისევ დაიმუქრა, რომ თუ პოლიცია დააყენებს კორდონს, მას გაარღვევენ და თუ ლგბტ პირები "ხელს შეუშლიან წესრიგის დამყარებაში", მაშინ "კომბლებით დაიცავენ თავს".

ამ მოვლენების ფონზე აშშ-ს სახელმწიფო დეპარტამენტმა განაცხადა, რომ ღრმადაა შეშფოთებული ლგბტქ თემის წინააღმდეგ გამოთქმული მუქარებით თბილისი პრაიდის მარშის წინ და კატეგორიულად გმობს ადამიანების დევნას რაიმე, კერძოდ, სექსუალური ორიენტაციის ან გენდერული იდენტობის მიზეზით. მოვლენებს გამოეხმაურა ნიდერლანდების საელჩოც და მოუწოდა თავის მოქალაქეებს, რომ მომატებული საფრთხის გამო მოერიდონ ღირსების მარშს.

ამ ყველაფრის ფონზე კი მთავრობის მეთაური მამუკა ბახტაძე აცხადებს, რომ ბოლო დღეებში სახელმწიფო ინსტიტუტები მოწოდების სიმაღლეზე იყვნენ და ლგბტ თემის პრობლემები გაზვიადებული და თავსმოხვეულია. მისი მტკიცებით, საქართველოში სხვა უფრო მნიშვნელოვანი პრობლემებია, ვიდრე ადამიანის უფლებები, რადგან მისივე თქმით, ეს უფლებები დაცულია.

გაიგეთ მეტი: