თბილისი პრაიდი მოუწოდებს შინაგან საქმეთა სამინისტროს, დაუყოვნებლივ დაიწყოს გამოძიება ლევან ვასაძის მიერ დღეს, 16 ივნისს ვერის ბაღში გაკეთებულ განცხადებებზე. მათი თქმით, ვასაძის მოწოდებები შეიცავს სისხლის სამართლის კოდექსით გათვალისწინებულ განსაკუთრებით მძიმე დანაშაულის ნიშნებს. კერძოდ, უკანონო ფორმირების შექმნას.

პრაიდის განცხადებით, სახეზეა დანაშაულის ყველა ელემენტი:

  • ჯგუფი იქმნება იმისთვის რომ, პირის თავისუფლად გადაადგილების უფლება;
  • შეზღუდოს ("ქამრებით შევუკრავთ ხელებს და გავიყვანთ") — განხორციელდეს მისი თავისუფლების უკანონო აღკვეთა (სსკ მუხლი 144);
  • ქამრები და კომბლები შეიძლება ადამიანის დასაზიანებლად გამოიყენონ;
  • ეს მიზანი პირდაპირაა გაცხადებული, ანუ სახეზეა განზრახვა;
  • რეალური და მყისიერი საფრთხე სახეზეა.

ლევან ვასაძე თავის ორგანიზებულ "ნამდვილი კაცების" აქციაზე ძალადობრივ მოწოდებებს ავრცელებს და მხარდამჭერებს დაუმორჩილებლობისკენ მოუწოდებს. ვასაძე ემუქრება ლგბტ პირებს, სამართალდამცავებს, დიპლომატებს, უცხოელ სტუმრებსა და არასამთავრობო ორგანიზაციებს. ის ამბობს, რომ პოლიციას თუ არ "ეყოფა ჭკუა" და კორდონს ჩადგამს, მაშინ მხარდამჭერებთან ერთად მას კომბლებით შეიარაღებული გაარღვევს. ასევე, ვასაძე ლგბტ პირებს "ხელების ქამრით შეკვრითა და ყურის აწევით" ემუქრება.

ამ საკითხებთან დაკავშირებით შინაგან საქმეთა სამინისტროს ჯერ გამოძიება არ დაუწყია. როგორც On.ge-ს განუცხადეს, თუ უწყებას განცხადება ექნება, თავად გაავრცელებენ.