ბიზნესმენმა ლევან ვასაძემ თავისივე დაანონსებულ "ნამდვილ კაცთა" აქციაზე სახალხო რაზმების ორგანიზება და ლეგიონის შექმნა დააანონსა.

"ჩვენ გვეყოლება ათეულები ათისთავებით, ეს ათეულები შეიკვრება ასეულებად ასისთავებით და ეს ასეულები შეიკვრება ათასეულებად და იქნება ლეგიონი", — განაცხადა მან.

მისი თქმით, ლეგიონის მუშაობის ფორმა იქნება მშვიდი, იარაღის გარეშე, მაგრამ თავადვე ამბობს, რომ ნებისმიერ კორდონს გაარღვევენ.

ვასაძემ მხარდამჭერებს ძალადობისა და დაუმორჩილებლობისკენ მოუწოდა. მან განაცხადა, რომ პოლიციას თუ არ "ეყოფა ჭკუა" და კორდონს ჩადგამს მათსა და თბილისი პრაიდის მონაწილეებს შორის, მაშინ მხარდამჭერებთან ერთად კომბლებით შეიარაღებული გაარღვევს. ვასაძე დაემუქრა ლგბტ პირებსაც და განაცხადა, რომ თუ "გააბრაზებენ", ლეგიონის წევრები "ხელებს შეუკრავენ" და "ყურებს აუწევენ".

ამ საკითხებთან დაკავშირებით შინაგან საქმეთა სამინისტროს ჯერ გამოძიება არ დაუწყია. როგორც On.ge-ს განუცხადეს, თუ უწყებას განცხადება ექნება, თავად გაავრცელებენ.