სპეციალური პენიტენციური სამსახური რუსთავის N17 დაწესებულებაში პატიმრის გარდაცვალების ფაქტზე განცხადებას ავრცელებს.

სამსახურის განცხადებით, მსჯავრდებული სასჯელს 20-კაციან საკანში იხდიდა და ის დილით თანამესაკნემ საპირფარეშოში ჩამომხრჩვალი იპოვა.

"პენიტენციური სამსახური მწუხარებას გამოთქვამს №17 პენიტენციურ დაწესებულებაში მსჯავრდებულის გარდაცვალების გამო და სამძიმარს უცხადებს გარდაცვლილის ოჯახის წევრებსა და ახლობლებს.

აღნიშნულთან დაკავშირებით განვმარტავთ, რომ 2026 წლის 2 ოქტომბერს №17 პენიტენციურ დაწესებულებაში მსჯავრდებული ი. გ. თანამესაკნემ დილით საპირფარეშოში ჩამომხრჩვალი იპოვა.

მომხდარ ფაქტთან დაკავშირებით პენიტენციური სამსახურის მიერ მყისიერად ეცნობა ქვემო ქართლის პროკურატურას და დაიწყო გამოძიება. აღსანიშნავია, რომ მსჯავრდებული 2023 წლიდან (სასჯელის დასრულების თარიღი – 2028 წელი) იმყოფებოდა მე-17 პენიტენციურ დაწესებულებაში, სადაც სასჯელს იხდიდა 20-კაციან საკანში. გარდაცვალების დღესაც, ვინაიდან შემთხვევა მოხდა დილის საათებში, მისი თანამესაკნეები იმყოფებოდნენ საკანში.
პენიტენციური სამსახური აქტიურად თანამშრომლობს საგამოძიებო ორგანოსთან და გამოძიებისთვის უკვე მიწოდებულია საქმესთან დაკავშირებული ყველა შესაბამისი მასალა," — წერს უწყება.

აღსანიშნავია, რომ პენიტენციური სამსახურის ცნობით, მსჯავრდებულს პენიტენციური დაწესებულება 2028 წელს უნდა დაეტოვებინა. გარდაცვლილის მამიდამ კი "ტვ პირველთან" საუბარში განაცხადა, რომ პატიმარი ციხეს 2-3 თვეში ტოვებდა და თვითმკვლელობის ვერსიის სწორედ ამიტომ არ სჯერათ.