"მე კოლეჯიდან არ წავსულვარ! გამაგდეს! გამაგდეს ისე, რომ იმის ღირსადაც არ ჩამთვალეს, მიზეზი ეთქვათ!" — თბილისის სახელმწიფო უნივერსიტეტის მედიისა და ტელეხელოვნების კოლეჯის დამფუძნებლის, ზურაბ ოშხნელის განცხადებით, ის კოლეჯის დირექტორის პოზიციიდან გაათავისუფლეს.

70 წლის ზურაბ ოშხნელმა 1989 წელს მედიისა და ტელეხელოვნების კოლეჯი შექმნა და, მისი თქმით, განათლების სამინისტროს 22 მინისტრთან ითანამშრომლა.

"ჯამში, ვიმუშავე განათლების 22 მინისტრთან. იყო კომუნიკაცია, იყო აზრთა სხვადასხვაობაც, იყო გაუგებრობებიც, მაგრამ ყველამ იცოდა, რომ ვაკეთებდი ახალგაზრდებისთვის მნიშვნელოვან საქმეს და არაფერს პირადულს! იგივე შეიძლება ითქვას ქართული ოცნების დანიშნულ განათლების რამდენიმე მინისტრზეც," — წერს ყოფილი დირექტორი.

ოშხნელი სოციალურ ქსელში გამოქვეყნებულ ვრცელ წერილში ხსნის, რომ მისი შემცვლელი, ლევან ალიმბარაშვილი "შვიდი თვის ძებნის შემდეგ" იპოვეს. მისი განმარტებით, დირექტორის პოზიციაზე კონკურსი მანამდე ორჯერ ჩატარდა და ორივეჯერ ჩავარდა, რადგან "პირველი ორი მცდელობისას მოტყუებით მიყვანილმა კანდიდატებმა რეალობის გაგებისას უარი განაცხადეს პოზიციის დაკავებაზე".

ოშხნელი განცხადებაში წერს, რომ მას განათლების სამინისტროსგან აღნიშნულ გადაწყვეტილებაზე ახსნა-განმარტება არ მიუღია და დასძენს, რომ "დავალება "ზემოდან" მოვიდა".

"გამაგდეს ე.წ. საკონკურსო შერჩევის ფორმით, მესამე მცდელობისას. პირველი ორი მათთვის უშედეგოდ დასრულდა, რადგან მოტყუებით მიყვანილმა კანდიდატებმა რეალობის გაგებისას უარი განაცხადეს ჩემი ადგილის დაკავებაზე. ვაფასებ მათ ღირსეულ გადაწყვეტილებას!

მესამე მცდელობა წარმატებული აღმოჩნდა — შვიდი თვის ძებნის შემდეგ, რის ვაი-ვაგლახით მონახეს კოლეჯის დირექტორის სკამის (ჩემი "გათლილი" სკამის) დაკავების მსურველი! შესაბამისად, საკონკურსო კომისიას მხოლოდ მისი "გაპრავების" ვალდებულებაღა დაუტოვეს!

მე არ ვიცი, ამ გადაწყვეტილებით ვისი დაკვეთა შესრულდა! მკითხაობას ვერ დავიწყებ, თუმცა ზოგიერთი მოვლენითა და ამ საქმეში მეტ-ნაკლებად გარეული ადამიანების გამონათქვამებით თუ ვიმსჯელებ, დავალება "ზემოდან" მოვიდა!

მე არასდროს მიმუშავია "ზემოთ" და არც რომელიმე პარტიის წევრი ვყოფილვარ," — წერს ოშხნელი.

ოშხნელი განცხადებაში ასევე განმარტავს, რომ არ აპირებდა დირექტორის პოზიციის "სამუდამოდ" დაკავებას და მიმდინარე წლის თებერვალში განათლების სამინისტროსთან მისი შემცვლელი კანდიდატის არჩევაზე მოლაპარაკება დაიწყო.

"მიუხედავად იმისა, რომ ჩემი იდეითა და ინიციატივითაა შექმნილი კოლეჯი, მინდა აქაც განვმარტო, რომ არ ვაპირებდი სამუდამოდ დირექტორობას. ჯერ კიდევ თებერვალში, გასაუბრებაზე, მე ჩემს ერთ-ერთ პრიორიტეტად დავაყენე ჩემი შემცვლელი ახალგაზრდა და განათლებული კანდიდატის სამინისტროსთან ერთობლივად შერჩევის საკითხი! როგორც ჩანს, კოლეჯიდან ჩემი წასვლის ამ ვარიანტმა მხარდაჭერა არ მოიპოვა!

ყველას გასაგონად ვამბობ — კოლეჯი დიდი ხანია, რაც აღარაა ჩემი კუთვნილება! ის ეკუთვნის სრულიად საქართველოს ყველა ახალგაზრდას, მის ყველა კურსდამთავრებულს და მასწავლებელს; ამდენად, ყველაფერზე, რაც წინამდებარე "გენიალური" გადაწყვეტილების გამო კოლეჯში მოხდება, პასუხს კოლეჯის დასამარების აქტზე ხელმომწერები აგებენ!

დღეს არაფერს ვიტყვი პირზე, რომლის სურვილი, როგორც ვხვდები, მის უნარებს ბევრად აღემატება და ამის სადემონსტრაციოდ მხოლოდ ერთ ლეგალურად მოპოვებულ დოკუმენტს გამოვაქვეყნებ," — წერს ოშხნელი.

ვინ არის ლევან ალიმბარაშვილი?

კოლეჯის მიერ გამოქვეყნებული ინფორმაციის თანახმად, ალიმბარაშვილს მედიასფეროში 25-წლიანი გამოცდილება აქვს. "რადიო თავისუფლების" ინფორმაციით, ალიმბარაშვილი წლების განმავლობაში მთავრობის ადმინისტრაციაში მუშაობდა ოპერატორად.

"დღეს შედგა პირველი გაცნობითი შეხვედრა, სადაც დირექტორმა გუნდს კოლეჯის განვითარების სტრატეგიული ხედვა გაუზიარა.

მედიისა და ტელეხელოვნების კოლეჯის მთავარ პრიორიტეტად რჩება სტუდენტებისთვის თანამედროვე, მაღალი ხარისხის განათლების შეთავაზება და მათი პროფესიული განვითარების ხელშეწყობა," — წერს კოლეჯი განცხადებაში.

ოშხნელმა სოციალურ ქსელში ასევე გამოაქვეყნა ხელნაწერი დოკუმენტი. მისი განცხადებით, აღნიშნული დოკუმენტი ალიმბარაშვილის მიერ განათლების მინისტრ გივი მიქანაძის სახელზე დაწერილი განცხადებაა, სადაც ოშხნელმა სამ ორთოგრაფიულ შეცდომას გაუსვა ხაზი.