მსჯავრდებული გიორგი დავითაძის ოჯახის წევრები და ახლობლები რუსთავის მეექვსე ციხესთან შეიკრიბნენ. საპროტესტო აქციაზე შეკრებილები ციხეების უფროსის გადადგომას და შესაძლო ძალადობაში მონაწილე ბადრაგების დასჯას მოითხოვდნენ.

აქციაზე მისულმა მსჯავრდებულის მამამ, ავთანდილ დავითაძემ დეესკალაციის საკანში მომხდარი ინციდენტის გამოსაძიებლად იმ ბადრაგების ვინაობის დადგენა მოითხოვა, რომლებიც შესაძლო ძალადობაში მონაწილეობდნენ.

დავითაძე ასევე გამოეხმაურა ციხეების უფროსის, გიორგი პატარიძის განცხადებას, რომელმაც მე-6 დაწესებულების თანამშრომლებს გაწეული სამსახურისთვის მადლობა გადაუხადა.

"თითოეული ამ მოძალადე ჯალათის ფოტო უნდა იყოს იდენტიფიცირებული და ქვეყანას უნდა ვაცნობოთ, როგორი ჯალათური სისტემა მართავს ნომერ მეექვსე დაწესებულებას. ამხელა თანამდებობის პირი, რომელსაც აბარია სასჯელაღსრულების დეპარტამენტი და ვალდებულია დაიცვას ყველა პატიმრის ღირსება და უფლებები, გამოდის და ამის მერე კიდევ ერთხელ მადლობას უხდის ჯალათ მოძალადეებს, მაგარი ბიჭები არიანო. აი როგორ ვირწმუნო მე ამათი, ამ მომპალი სისტემის და როგორ დავიძინო მე, როგორც მამამ, რომ ესენი ჩემს შვილს ხვალ და ზეგ უფრო უარესს არ მოუწყობენ", — თქვა ავთანდილ დავითაძემ (მის კომენტარს "ტვ პირველი" ავრცელებს).

კომენტარი გააკეთა აქციაზე მისულმა პატიმრის მეუღლემ, თამარ რამიშვილმაც.

"მადლობას რომ უხდიან იმ ბადრაგებს გიორგი კვარაცხელიათი დაწყებული დანარჩენებით დამთავრებული, მინდა მოგმართოთ ბატონო გიორგი პატარიძე, მეც გადაგიხდით მადლობას, თუ თქვენ ზუსტად ასე ჩაგიტარებენ ჩხრეკას, გადაგაწვენენ, 6 კაცი დაგაწვებათ თავზე, იმ მანევრებსაც გააკეთებს, რაც გიორგის გაუკეთეს და კიდევ რაღაცებს დაგარტყამენ ჩუმად, მეც გადავიხდი თქვენს ყველა ბადრაგს უღრმეს მადლობას. ველოდები თქვენგან 4 ნახევრ წუთიან ვიდეოს", — თქვა თამარ რამიშვილმა ("ტვ პირველი").

შეგახსენებთ, პატიმარმა გიორგი დავითაძემ სააპელაციო სასამართლოს დარბაზში განაცხადა, რომ მეექვსე პენიტენციური დაწესებულების ციხის სამარტოო საკანში ბადრაგმა მასზე სექსუალურად იძალადეს. აუდიოჩანაწერში, რომელსაც "ტვ პირველი" ავრცელებს, პატიმარი ამბობს, რომ "დეესკალაციის ოთახში ჩაიყვანეს და 10-მა ბადრაგმა თითით გააუპატიურა".

ვრცლად ამ თემაზე: