6 წლის წინ გარდაცვლილი 23 წლის პროგრამისტის თამარ ბაჩალიაშვილის საქმის გამოძიების განახლების მოთხოვნით გენერალურ პროკურატურასთან მეცხრე კვირაა პერმანენტული აქციები მიმდინარეობს.

"არც დავიღლები, არც გავჩერდები, ბრძოლა იქნება ბოლომდე", — ამბობს თამარ ბაჩალიაშვილის დედა, თეონა თამაზაშვილი და საზოგადოებას მხარდაჭერისკენ მოუწოდებს.

"ვაგრძელებთ პერმანენტულ აქციებს პროკურატურასთან მოთხოვნით — დაისაჯონ თამარ ბაჩალიაშვილის მკვლელები. არც დავიღლები და არც გავჩერდები. ბრძოლა იქნება ბოლომდე.

მოვუწოდებ ყველა დედას — შვილმოკლულ დედებს, დაკარგული ბავშვის დედებს. გავერთიანდეთ, ერთ მუშტად შევიკრათ და ისე ვებრძოლოთ ამ პროკურატურასთან. გათითოკაცებულებს ადვილად გვერევიან და ადვილად ახშობენ ჩვენს პროტესტს", — ამბობს თამარ ბაჩალიაშვილის დედა.

მის ვიდეოს სოციალურ ქსელში ოპოზიციონერი დეპუტატი თეონა ჭალიძე ავრცელებს.

შეგახსენებთ, რომ თამარ ბაჩალიაშვილი 6 წლის წინ, 2020 წლის ივლისში გარდაიცვალა. 23 წლის პროგრამისტი გაუჩინარებიდან ოთხი დღის შემდეგ, 22 ივლისს, თეთრიწყაროს მუნიციპალიტეტში, საკუთარ ავტომობილში იპოვეს. 2020 წლის დეკემბერში პროკურატურამ გამოძიება დაასრულა და დაასკვნა, რომ ბაჩალიაშვილმა სიცოცხლე თვითმკვლელობით დაასრულა და მის მიმართ დანაშაულს ადგილი არ ჰქონია. 2026 წლის აგვისტოში უწყებამ ეს პოზიცია კვლავ დაადასტურა და განაცხადა, რომ საქმის ხელახალი გამოძიების საფუძველი არ არსებობს. ბაჩალიაშვილის ოჯახი კი ოფიციალურ ვერსიას არ ეთანხმება და საქმის ხელახლა გამოძიებას ითხოვს.