11 წლის ობოლ ბიჭს, რომელმაც თითქმის მთელი ცხოვრება გლაზგოში გაატარა, საქართველოში დეპორტაცია ემუქრება.

გიორგი კაკავას შესახებ ბრიტანული გამოცემა, The London Economic წერს, სათაურით 11 წლის ობოლ ბიჭს იმ ქვეყანაში დეპორტაცია ემუქრება, რომელიც არ ახსოვს.

გიორგი 8 თვის იყო, როდესაც საქართველოდან წამოიყვანეს. მისი დედა სოფიო ბაიხაძე შიშობდა, რომ კრიმინალები, რომლებმაც ქმარი ვალის გამო მოუკლეს, მის შვილსაც მოკლავდნენ ან გაიტაცებდნენ. გიორგი 3 წლის იყო, როდესაც დედამ შოტლანდიაში ჩაიყვანა.

სოფიო ბაიხაძე და გიორგი კაკავა

ფოტო: SWNS

სოფიო 2018 წლის თებერვალში, გარდაიცვალა. ის 35 წლის იყო და გლაზგოში ყოფნის განმავლობაში თავშესაფრის მიღებას ელოდა. მისი საბოლოო სურვილი იყო, რომ გიორგი, რომელსაც გლაზგური აქცენტი აქვს და ქართული არ იცის, შოტლანდიელ ბიჭუნად გაზრდილიყო.

ადამიანის უფლებათა დამცველები ამბობენ, რომ გიორგის დეპორტაციით ბავშვის უფლებები ირღვევა.

გიორგი კაკავა და ბავშვთა უფლებების ექსპერტი, ტრეისი კირკი.

ფოტო: SWNS

შოტლანდიური ეკლესია კი დიდი ბრიტანეთის შინაგან საქმეთა მინისტრს, საჯიდ ჯავიდს, რომელიც პაკისტანიდანაა, მოუწოდებს გიორგის დარჩენის უფლება მისცეს.

"სოფიო ჭკვიანი გოგო იყო, მაგრამ საქართველოში მძიმე ცხოვრება ჰქონდა. ის შოტლანდიაში ჩამოვიდა, რათა კრიმინალურ დაჯგუფებას გაქცეოდა. ისინი გიორგის ემუქრებოდნენ. ჩემი შვილი იმედოვნებდა, რომ გლაზგოში მშვიდი ცხოვრება ექნებოდა, თუმცა მძმე ავადმყოფობის შემდეგ გარდაიცვალა", — ამბობს ქეთინო, სოფიოს დედა.

ის დასძენს, რომ მისი შვილი კეთილი და მოსიყვარულე ადამიანი იყო, რომელიც შვილზე გიჟდებოდა:

"ის ჩემი ყველაფერი იყო. მისი გარდაცვალების შემდეგ, გულგატეხილი ვარ. არ შემიძლია გიორგის მარტო დატოვება, მე ახლა მისთვის ვცხოვრობ. მას არც დედა ჰყავს, არც მამა და ყველაზე მეტად გლაზგოში დარჩენა სჭირდება. აქ ცხოვრობენ მისი მეგობრები, ასე რომ მისთვის დეპორტაცია უმძიმესი გადასატანი იქნება. მას ქართული არ ესმის, მხოლოდ ინგლისურად საუბრობს. ხანდახან კითხვებს ქართულად ვუსვამ, ის მეუბნება რომ არ ესმის, რადგან შოტლანდიელია".

გიორგი კაკავა და ბებია, ქეთინო ბაიხაძე.

ფოტო: Sunday Post

2018 წლის ივლისში, ონლაინ პეტიციამ, რომელიც გიორგის შოტლანდიაში დატოვებას ითხოვდა, დიდი ბრიტანეთი მოიცვა. კამპანიას 90 209 ადამიანმა მოაწერა ხელი. გიორგის და ქეთინოს დიდ ბრიტანეთში 30 თვით დარჩენის უფლება მისცეს. პეტიციის ავტორი გლაზგოს ეკლესიის წინამძღვარი ბრაიან კასეია, რომელმაც შს მინისტრ ჯავიდს გიორგის და ბებიის შოტლანდიაში სამუდამოდ დარჩენა სთხოვა.

გიორგის უფლება აქვს შოტლანდიაში 2020 წლის თებერვლამდე დარჩეს. მის ბებიას, ქეთინო ბაიხაძეს კი — 2020 წლის დეკემბრამდე. უცნობია, რა პირობებში შეძლებს გიორგი ცხოვრებას ბებიის გარეშე.