იუსტიციის უმაღლესი საბჭოს არამოსამართლე წევრი, ნაზი ჯანეზაშვილი ამბობს, რომ იუსტიციის საბჭოს მდივანი, გიორგი მიქაუტაძე უზენაესის სასამართლოს მოსამართლეობისთვის ფორმალურ კრიტერიუმს ვერ აკმაყოფილებს. როგორც ჯანეზაშვილმა On.ge-ს უთხრა, დადგენილი წესის თანახმად, განმცხადებელმა სამი რეკომენდატორი უნდა მიუთითოს, ხოლო გიორგი მიქაუტაძეს მხოლოდ ორი რეკომენდატორი ჰყავს მითითებული.

"ეს ნიშნავს იმას, რომ მან დაარღვია ის წესი, რომელიც მიიღო იუსტიციის უმაღლესმა საბჭომ. შესაბამისად მან სრულყოფილად არ შეავსო განაცხადი და არ უნდა გადავიდეს შემდეგ ეტაპზე", — აღნიშნა ნაზი ჯანეზაშვილმა.

რაც შეეხება უზენაესი სასამართლოს მოსამართლეობის მსურველებს, ჯანეზაშვილი ამბობს, რომ სია საინტერესოა და მასში ღირსეული კანდიდატებიც მონაწილეობენ.

"მიხეილ ჩინჩალაძე სიაში რომ არ არის, ეს არის ჩინჩალაძის მორალური დამარცხება, რადგან მას ჰქონდა პრინციპული დამოკიდებულება, როგორ ჩემთვის არის ცნობილი, რომ უნდოდა უზენაესი სასამართლოს მოსამართლეობა. არა იმიტომ, რომ გავლენები ჰქონოდა, მას გავლენები არ აკლია, არამედ იმიტომ, რომ ეს მისი სურვილი იყო, რადგან წლების განმავლობაში ის უზენაესი სასამართლოს მოსამართლე იყო", — უთხრა ნაზი ჯანეზაშვილმა On.ge-ს.

გიორგი მიქაუტაძის რეკომენდატორებთან დაკავშირებით On.ge იუსტიციის უმაღლეს საბჭოს დაუკავშირდა. მათი თქმით, რეკომენდატორების მითითება სავალდებულოა და ორი რეკომენდატორის მითითებაც დაშვებულია.

"საბჭოს გადაწყვეტილებით, რეკომენდატორის მითითება სავალდებულო, მაგრამ შენიშვნასავით არის, რომ არანაკლებ სამისა, მაგრამ ორიც რომ მიუთითო დაშვებულია", — განმარტეს საბჭოში.

უზენაესი სასამართლოს მოსამართლეობის სურვილი 144-მა პირმა გამოთქვა. იუსტიციის უმაღლესმა საბჭომ მსურველთა სია გამოაქვეყნა. მსურველებს შორის არიან იუსტიციის უმაღლესი საბჭოს მდივანი გიორგი მიქაუტაძე, გენერალური პროკურორი შალვა თადუმაძე და საკონსტიტუციო სასამართლოს მოსამართლე ზაზა თავაძე. გარდა ამისა, უზენაესის მოსამართლეობა სურს თბილისის სააპელაციო სასამართლოს უვადო მოსამართლე თამარ ალანიას.

ძველი ათკაციანი სიიდან სიაში წარმოდგენილი არ არიან თბილისის სააპელაციო სასამართლოს თავმჯდომარე მიხეილ ჩინჩალაძე და იუსტიციის საბჭოს მოსამართლე წევრი დიმიტრი გვრიტიშვილი. გარდა ამისა, ძველი სიიდან მსურველებს შორის არიან მარიამ ცისკაძე, ნინო ქადაგიძე, პაატა სილაგაძე, მერაბ გაბინაშვილი. ნინო სამნიძე და გიორგი თავაძე მონაწილეობას აღარ იღებენ.