1990-დან 2005 წლამდე ფილიპინებზე ტყის მასის 32,3 პროცენტი განადგურდა. ხე-ტყის უკანონო ჭრა ქვეყნისთვის ისტორიული პრობლემაა, თუმცა ფილიპინების მთავრობამ მის გადასაჭრელად ახალი ხერხი მოიფიქრა — კანონი, რომელიც სტუდენტებსა და მოსწავლეებს უნივერსიტეტის დამთავრებამდე 10 ხის დარგვას ავალდებულებს. კანონი დასამტკიცებლად სენატს გადაეცა.

"თუ ამ კანონს სწორად გამოვიყენებთ, ყოველწლიურად 175 მილიონი ახალი ხე დაირგება. ერთი თაობის განმავლობაში კი ეს 525 მილიარდი ხის დარგვას უზრუნველყოფს. იმ შემთხვევაშიც კი, თუ ხეების მხოლოდ 10 პროცენტი გადარჩება, 525 მილიონ ახალ ხეს მივიღებთ", — აცხადებს კანონპროექტის ერთ-ერთი ავტორი გარი ალეჟანო.

მთავრობის რამდენიმე სხვადასხვა სააგენტო კი თესლების წარმოებასა და ხეების დასარაგავად ადგილების შესაბამისად მომზადებაზე იქნება პასუხისმგებელი.

ეს მსგავსი იდეის წამოჭრის პირველი შემთხვევა არ არის. ფილიპინების მთავრობამ მსგავსი პროექტი 2012 წელსაც განიხილა.

ასეთი ინდივიდუალური მიდგომები შედეგიანია, თუმცა ადამიანების ნაწილის აზრით, ხე-ტყის განადგურებასთან ბრძოლის ყველაზე ეფექტური მეთოდი იმ ინდუსტრიებსა და დარგებში მომუშავე კომპანიებისა და ორგანიზაციების მკაცრად დარეგულირებაა, რომლებიც სარგებელს ბუნების განადგურებით ნახულობენ.

ახალი ხეების დარგვა ცალსახად კარგია, თუმცა უნდა აღვნიშნოთ, რომ ბიომრავალფეროვნების თვალთახედვიდან ძველი ტყეები უფრო ღირებული და ძვირფასია. ძველი ტყეები ახლებს ეკოლოგიური ფუნქციითაც სჯობნიან, მაგალითად, ისინი ატმოსფეროდან უფრო მეტ ნახშირორჟანგს შთანთქავენ.

როგორც ჩანს, ფილიპინების მთავრობა აღნიშნულ საკითხზე აქტიურად მუშაობს. ხეების დარგვასა და ბიომრავალფეროვნების შენარჩუნებაზე ყველა ქვეყანამ უნდა იზრუნოს, რათა ის ზიანი, რომელიც ბუნებას უკვე მივაყენეთ, შეძლებისდაგვარად ავანაზღაუროთ. თუმცა უნდა გვახსოვდეს, რომ ახალი ხეების დარგვის გარდა არსებული ტყეების შენარჩუნებაც არანაკლებ აუცილებელია.