ანაკლიის განვითარების კონსორციუმის გენერალურმა დირექტორმა, ლევან ახვლედიანმა განაცხადა, რომ ინვესტორი ბანკების 8 მოთხოვნიდან 7-ზე პრინციპული შეთანხმება მიღწეულია. ამის შესახებ ლევან ახვლედიანმა ანაკლიის პორტის საინვესტიციო ხელშეკრულების შესახებ გამართული სამმხრივი შეხვედრის დასრულების შემდეგ განუცხადა.

მისივე განცხადებით, ტვირთბრუნვის რისკის სახელმწიფოს მიერ დაზღვევის შესახებ მოთხოვნაზე მოლაპარაკებები გაგრძელდება და ამ პუნქტთან მიმართებაში გარკვეულ ალტერნატივებზეა საუბარი.

"დარჩა ერთი მთავარი საკითხი, რომელიც ტვირთბრუნვის რისკის მიტიგაციას ეხება. ამ საკითხთან დაკავშირებით შეთანხმება ჯერ არ მომხდარა, მაგრამ არის ალტერნატიული ვერსიები, მათ შორის საუბარია ევროკავშირის ერთ-ერთი შვილობილი კომპანიის ჩართულობაზე. ვიმუშავებთ ამ ალტერნატიულ ვარიანტზე და უახლოეს მომავალში შედგება დამატებითი განხილვები, თუმცა ეს თავისთავად არ ნიშნავს, რომ მთავრობა გამორიცხულია ამ პროცესიდან, გარკვეული ჩართულობა ყველა მხარეს მოუწევს", —განაცხადა ლევან ახვლედიანმა.

საქართველოს ფინანსთა მინისტრის, მიხეილ მაჭავარიანის განცხადებით, ნვესტორის კომერციული რისკის დაზღვევის მიმართულებით სახელმწიფო დათმობაზე ვეღარ წავა. მაჭავარიანი ვარაუდობს, რომ მოლაპარაკებების კიდევ რამდენიმე რაუნდი გაიმართება, თუმცა მისი თქმით, პროგრესი უკვე იგრძნობა.

"არსებობს პოლიტიკური რისკები, არსებობს ფორსმაჟორი, გარემოსთან დაკავშირებული რისკები, საკანონმდებლო რისკები, რაც სამომავლოდ შესაძლოა მოხდეს. ყველა ტიპის რისკზე ჩვენ მაქსიმალურად კონსტრუქციული ვართ, მაქსიმალურად ღია ვართ, წავიდეთ ამ დახმარებაზე. რაც შეეხება ბიზნესის კომერციულ, ტვირთების რისკზე, მიგვაჩნია, რომ ეს არ არის სწორი. საერთაშორისო სავალუტო ფონდთან შეთანხმებული პროგრამა არ ითვალისწინებს ამას, რომ სახელმწიფომ დამატებით აიღოს ფინანსური რისკი ამ ნაწილში", — განაცხადა ფინანსთა მინისტრმა.

ანაკლიის განვითარების კონსორციუმის, მთავრობისა და საერთაშორისო ინსტიტუტების წარმომადგენლებს შორის პირველი სამუშაო შეხვედრა გაიმართა. სამმხრივი შეხვედრების თემა საერთაშორისო საფინანსო ორგანიზაციების მიერ პროექტის დაფინანსებისთვის დაყენებული რვაპუნქტიანი მოთხოვნებია.

საფინანსო ინსტიტუტებთან მოლაპარაკებების პირველი რაუნდი გაიმართა მიმდინარე წლის 8 თებერვალს. შეთავაზებული ცვლილებები ითვალისწინებს სახელმწიფოს მიერ ინვესტორის კომერციული რისკების დაზღვევას, პორტის განვითარების ფაზების ახლებურ რეგულირებას, საკანონმდებლო ცვლილებებით გამოწვეული ზიანის ანაზღაურებას, ხელშეკრულების შეწყვეტის შემთხვევაში, სახელმწიფოს მიერ კრედიტორების რისკის დაზღვევას და ა.შ.