საქართველოს შინაგან საქმეთა მინისტრის გიორგი გახარია აცხადებს, რომ ვიზალიბერალიზაციის მიღების შემდეგ ევროპაში თავშესაფრის მაძიებელთა ზრდა მოსალოდნელი იყო. ამის შესახებ მან საფრანგეთის შს მინისტრთან ერთად გამართულ ბრიფინგზე განაცხადა.,

გახარიას თქმით, ამ მხრივ გამოწვევები არსებობს, თუმცა სახელმწიფოს აქვს გეგმა, როგორ უპასუხოს მათ.

"მინდა გითხრათ, რომ თავშესაფრის მაძიებლების რაოდენობის ზრდა, მას შემდეგ რაც საქართველომ აბსოლუტურად დამსახურებულად მიიღო თავისუფალი უვიზო მიმოსვლა, იყო ბუნებრივი და მოსალოდნელი პროცესი. ჩვენ სრული პასუხისმგებლობით აღვიქვამთ ჩვენი ევროპელი კოლეგების კითხვებს ამ მიმართებაში. ერთობლივად ვმუშაობთ და დარწმუნებულები ვართ, რომ ერთობლივი მუშაობით ამ ციფრებს შევამცირებთ", — განაცხადა გახარიამ.

მან ყურადღება გაამახვილა საქართველოდან ევროპაში სამოგზაუროდ წასული პირების სტატისტიკაზე.

"მათი უდიდესი უმრავლესობა დაბრუნდა საქართველოში და უფრო მეტი ევროპა მოიტანეს საქართველოში, ისევე როგორც მეტი კულტურული გაცვლის შესაძლებლობა მიეცათ. ამიტომ, რა თქმა უნდა, გამოწვევები არსებობს. ჩვენი პასუხისმგებლობაა, რომ ამ გამოწვევებს ვუპასუხოთ", — განაცხადა შს მინისტრმა.

საქართველოში ვიზიტით მყოფმა საფრანგეთის შინაგან საქმეთა მინისტრმა, კრისტოფ კასტანერმა უკანონო მიგრაციაზე ისაუბრა. კასტანერის თქმით, საქართველოში არ არის ომი და მიიჩნევა მშვიდობიან ქვეყანად, შესაბამისად "არ არის ნორმალური" ერთ-ერთი პირველი იყოს თავშესაფრის მოთხოვნის თვალსაზრისით.

თითქმის ერთი თვეა საფ­რან­გე­თის ქა­ლაქ მონ­პე­ლი­ე­ში სა­ქარ­თვე­ლოს ათე­უ­ლო­ბით მო­ქა­ლა­ქე კარ­ვებ­ში ცხოვ­რობს. ე.წ. კარ­ვე­ბის ქა­ლაქ­ში მშობ­ლებ­თან ერ­თად 30-მდე ბავ­შვია. სა­ქარ­თვე­ლო­დან ჩა­სუ­ლე­ბი საფ­რან­გე­თის ხე­ლი­სუფ­ლე­ბის­გან თავ­შე­სა­ფარს ითხო­ვენ.

საქართველო უსაფრთხო ქვეყნების სიაში არაერთმა ევროპულმა ქვეყანამ შეიყვანა. საქართველო უსაფრთხო ქვეყნად გამოაცხადა ჩეხეთმა, ბულგარეთმა, საფრანგეთმა, ლიხტენშტაინმა, ავსტრიამ, ბელგიამ, ნიდერლანდებმა, ისლანდიამ, ლუქსემბურგმა, ირლანდიამ, ესტონეთმა და დანიამ.