დღეს, 29 ჰააგაში საქართველოსა და Eurojust-ს შორის თანამშრომლობის შეთანხმება ოფიციალურად გააფორმეს. Eurojust-ის პრეზიდენტის ლადისლავ ჰამრანის თქმით, ამით საქართველოს საშუალება ეძლევა, პირდაპირ კავშირზე იყოს ევროკავშირის 28 წევრ ქვეყანასთან, 3 ქვეყნის ურთიერთობის კოორდინატორ 6 პროკურორთან და 46 ქვეყნის პროკურორების გლობალურ ქსელთან:

"Eurojust-თან თანამშრომლობით, თქვენ მიიღებთ უფრო ეფექტურ მხარდაჭერას საზღვრის კვეთასთან დაკავშირებული ორგანიზებული დანაშაულისა და ტერორიზმის წინააღმდეგ ბრძოლაში. მეორე მხრივ, Eurojust-იც გაიძლიერებს საკუთარ პოზიციას როგორც გლობალური პარტნიორი საზღვრის კვეთასთან დაკავშირებული დანაშაულის წინააღმდეგ ბრძოლაში".

ევროკავშირის იუსტიციების სისტემებთან თანამშრომლობის ხელშეკრულებაზე, იუსტიციის მინისტრმა თეა წულუკიანმა განაცხადა, რომ ამით ევროკავშირი, ქართველ პროკურორებთან და გამომძიებლებთან ერთად სისხლის სამართლის საქმეებზე იმუშავებენ:

"იქნება ეს ჩვენი მოქალაქეების ჩართულობით ევროკავშირის ქვეყნებში ჩადენილი დანაშაული, თუ ნებისმიერი იმ პირის მიერ ჩადენილი ტრანსნაციონალური დანაშაული, რომელიც საქართველოს იურისდიქციის ქვეშ შეიძლება იმყოფებოდეს ან, უბრალოდ, ჩვენ შეიძლება ვფლობდეთ ამის შესახებ ინფორმაციას. ეს ხელმოწერა საშუალებას მისცემს უკვე დამოუკიდებელ და იუსტიციის სამინისტროსგან გამოყოფილ გენერალურ პროკურორს და მის ოფისს საქართველოს მხრიდან, რომ აქ, ჰააგაში, დაასახელოს თავისი წარმომადგენელი პროკურორი".