საქართველოს პარლამენტში ამოქმედებული ყვითელი დონის შემდეგ, ჟურნალისტთა დაცვის კომიტეტი საკანონმდებლო ორგანოს მოუწოდებს, პარლამენტის შენობაში მედიის წარმომადგენლების შესვლასთან დაკავშირებით 25 ნოემბერს დაწესებული შეზღუდვები დაუყოვნებლივ მოხსნას.

როგორც CPJ-ის ევროპისა და ცენტრალური აზიის პროგრამის კოორდინატორმა განაცხადა, შეზღუდვები მოქალაქეების უფლებას, იყვნენ ინფორმირებულები პოლიტიკური პროცესების შესახებ, საფრთხეს უქმნის, რის გამოც ჟურნალისტთა დაცვის კომიტეტი საქართველოს პარლამენტს მოუწოდებს, უზრუნველყოს პრესის თავისუფლად მუშაობა.

"საქართველოს ისტორიის გადამწყვეტ მომენტში, ჟურნალისტების პარლამენტში შესვლის შეზღუდვისკენ მიმართული ნაბიჯები შემაშფოთებელია და საფრთხეს უქმნის მოქალაქეების უფლებას, იყვნენ ინფორმირებულნი სასიცოცხლოდ მნიშვნელოვანი პოლიტიკური პროცესების შესახებ“, — თქვა გულნოზა საიდმა.


საქართველოს პარლამენტში 26 ნოემბრიდან შესაბამისი ბრძანების გაუქმებამდე უსაფრთხოების ყვითელი დონე ამოქმედდა. უსაფრთხოების ყვითელი დონე საკანონმდებლო ორგანოში შესვლის უფლებას მხოლოდ აკრედიტაციის მქონე ტელემედიას აძლევს, რაც შეეხება ონლაინმედიას და პრესის ჟურნალისტებს, მათ პარლამენტის შენობაში არ უშვებენ.