მაილი საირუსმა საბოლოოდ შეიტანა პასუხი სარჩელზე, რომელიც ამტკიცებს, რომ მისი სიმღერა — Flowers არღვევს ბრუნო მარსის სიმღერის — When I Was Your Man-ის საავტორო უფლებებს. საირუსი ამტკიცებს, რომ სარჩელი "საბედისწერო შეცდომაა", რასაც ისიც უსვამს ხაზს, რომ არც ბრუნო მარსი და არც სიმღერის სხვა თანაავტორები სარჩელს არ იზიარებენ.

სარჩელი, რომელშიც ნათქვამია, რომ Flowers-ში რამდენიმე ელემენტი მარსის ტრეკიდან მოიპარეს და ის არ იარსებებდა ბრუნო მარსის სიმღერის გარეშე, Tempo Music Investments-მა შეიტანა. მუსიკალურმა საინვესტიციო კომპანიამ ტრეკზე უფლებები When I Was Your Man-ის ოთხი თანაავტორიდან ერთ-ერთისგან მიიღო. როგორც საირუსის ადვოკატები ამბობენ, ის ფაქტი, რომ კომპანია ითხოვს უფლებებს ტრეკის მხოლოდ ერთ-ერთ თანაავტორის უფლებამოსილებით, მათ საქმეში გამოუსწორებელი ხარვეზი და საქმის წარმოებაში არ მისაღებად საკმარისი მიზეზია.

მომღერლის ადვოკატი, პიტერ ანდერსონი, ამტკიცებს, რომ კომპანიას კომპოზიტორ ფილიპ ლოურენსისგან ნაყიდი წილი არაექსკლუზიურ უფლებებს ანიჭებს სიმღერაზე და ასეთი შეზღუდული უფლებებით, Tempo Music Investments-ს ფედერალური კანონის შესაბამისად სარჩელის სასამართლოში შეტანის უფლება არ აქვს.

ცნობისთვის, Flowers-მა რვა კვირა გაატარა ჩარტების სათავეში და მაილის გრემის ჯილდოც მოუტანა. ინტერნეტში გავრცელებული ჭორების თანახმად, მარსის When I Was Your Man საირუსის ყოფილი ქმრის, ლიამ ჰემსვორტის, ფავორიტი სიმღერა იყო და მაილის Flowers ერთგვარი განქორწინების შემდგომი პასუხია მომღერლის მხრიდან.

ასევე იხილეთ: