გამოცდებზე მოხვდება მხოლოდ ის ნაწარმოები, რომელიც სასწავლო პროგრამებში სავალდებულოა, აღნიშნული ნაწარმოებები კი სასწავლო პროგრამაში არასავალდებულოა, — ამის შესახებ განათლების, მეცნიერებისა და ახალგაზრდობის მინისტრობის კანდიდატმა, ალექსანდრე წულაძემ ქართული ენისა და ლიტერატურის საგამოცდო პროგრამიდან ნაწარმოებების ამოღებასთან დაკავშირებით განაცხადა.

მინისტრობის კანდიდატს აქვს ინიციატივა, რომ ქართული ლიტერატურის საგამოცდო მასალებიდან ამოღებული ნაწარმოებები ახალი საგნობრივი სტანდარტების მიხედვით სავალდებულო გახდეს. თუმცა, მისივე განმარტებით, ეს საკითხი დამოუკიდებელ ექსპერტთა ჯგუფის გადასაწყვეტია.

"არ მინდა აუდიტორიას დავპირდე, რომ აუცილებლად შევიტანთ, იქიდან გამომდინარე, რომ რა იყოს სასწავლო ან საგამოცდო პროგრამაში, ექსპერტთა ჯგუფი წყვეტს. ექსპერტთა ჯგუფის მიერ რაიმეს შეთანხმების შემდეგ ამ საკითხების ფართო განხილვა და დისკუსია ხდება. დიდი სურვილი მაქვს და იმედია, შევძლებთ, მაგრამ ამ საკითხის დამოუკიდებელი ექსპერტები წყვეტენ", — განაცხადა ალექსანდრე წულაძემ.

მისი თქმით, მსოფლიოშიც ასეა, რომ ყველა ნაწარმოებს, რისი სურვილიც გვაქვს, რომ სკოლებში ისწავლებოდეს, სავალდებულოს ვერ გახდი. "ეს მეთოდოლოგიური თვალსაზრისით არასწორია. ვერავინ, ვერსად ვერ სწევს იმას, რისი სურვილიც სისტემას, განათლების სამინისტროს ან მასწავლებლებს აქვთ. ამიტომაა, რომ სასწავლო პროცესში მასალა იყოფა სავალდებულო და არასავალდებულო ნაწილად. გამოცდებზე მოხვდება მხოლოდ ის ნაწარმოები, რომელიც სავალდებულოდაა სასწავლი", — აცხადებს მინისტრობის კანდიდატი.

რაც შეეხება ინფორმაციას ისტორიის საგამოცდო პროგრამიდან საკითხების ამოღების შესახებ, განათლების, მეცნიერებისა და ახალგაზრდობის მინისტრობის კანდიდატი ოპონენტების შეფასებებს ტყუილის ტირაჟირებას უწოდებს და ამბობს, რომ პროგრამიდან არათუ რომელიმე საკითხი ამოიღეს, არამედ პირიქით - მიმართულება გააძლიერეს.

"ტყუილის ტირაჟირებაა - ისტორიის სასწავლო პროგრამიდან, ან საგამოცდო პროგრამიდან, არცერთი ის საკითხი, რომელსაც ჩვენი ოპონენტები მიუთითებენ, არ ამოგვიღია. პირიქით, ამ მიმართულებით აჯანყებების პარალელურად დაემატა მთლიანი თავი, რომელსაც ჰქვია საქართველოს დაპყრობა რუსეთის მიერ და ამ თავში შევიდა როგორც ჯანყი, ასევე 1832 წლის შეთქმულებაც და ცალკე გამოვიდა. აქამდე ეს არასდროს ყოფილა", — ამბობს ალექსანდრე წულაძე.

ამავე თემაზე: