შინაგან საქმეთა სამინისტრო რუსთავი 2-ის გადაცემა შაბათის კურიერის ანონსს გამოეხმაურა, რომლის მიხედვით, პოლიციის მხრიდან ადგილი ჰქონდა ცალკეული პირების მიმართ ძალის გადამეტებას. ანონსში ნათქვამია, რომ ოთხი ახალგაზრდა პოლიციის ერთ-ერთ განყოფილებაში "რადიატორს მიაბეს და აწამეს". კურიერის ანონსში ასევე ნაჩვენებია, სავარაუდო შემთხვევის ამსახველი ვიდეო-კადრები.

შინაგან საქმეთა სამინისტრო განმარტავს, რომ პოლიციამ არ დაუშვა შსს-ს შენობის დარბევა და კანონიერი მოთხოვნებისადმი დაუმორჩილებლობა, შესაბამისად, "დანაშაულის აღსაკვეთად, პოლიციელებმა გამოიყენეს პროპორციული ძალა".

"5 თებერვალს მოქალაქე თორნიკე ც.-ს ყაჩაღურად დაესხნენ თავს. მან შეატყობინა სამართალდამცავ ორგანოებს. მანვე პოლიციას მიუთითა დანაშაულის სავარაუდო ჩამდენ პირებზე. დაზარალებულის მითითების საფუძველზე, ზემოაღნიშნული პირები გადაიყვანეს პოლიციის განყოფილებაში საგამოძიებო მოქმედებების ჩატარების მიზნით. პოლიციის განყოფილებაში, გამოკითხვის დაწყებამდე, სავარაუდო ბრალდებულთაგან ერთ-ერთი, თემურ ს. თავს დაესხა პოლიციის თანამშრომელს და მიაყენა ფიზიკური შეურაცხყოფა. ასევე, თემურ ს.-მ მასთან ერთად დანაშაულის სავარაუდო ჩადენაში მონაწილე დანარჩენ 2 პირს მოუწოდა, დაერბიათ პოლიციის ადმინისტრაციული შენობა და თავს დასხმოდნენ პოლიციელებს, რაც განახორციელეს კიდეც. მიუხედავად პოლიციის არაერთგზის მოწოდებისა, აღნიშნული პირები განაგრძობდნენ სამართალდამცველებისთვის სიტყვიერი და ფიზიკური შეურაცხყოფის მიყენებას", — ნათქვამია შსს-ს განცხადებაში.

უწყება აცხადებს, რომ სამ დაკავებულს ბრალი წარედგინათ მოქალაქე თორნიკე ც.-ს მიმართ განხორციელებული ყაჩაღობისთვის და პოლიციის შენობაში სამართალდამცავების მიმართ დაუმორჩილებლობისთვის.

შსს-ს ცნობით, ერთ-ერთი დაკავებულის მამამ მიმართა გენერალურ ინსპექციას, პოლიციელების მხრიდან უფლებამოსილების შესაძლო გადამეტების ფაქტის შესწავლის მიზნით, თუმცა ამ დროისთვის, პოლიციელების მხრიდან რაიმე სახის გადაცდომა ან ძალის გადამეტება არ დასტურდება. საქმის მასალები ასევე გადაგზავნილია გენერალურ პროკურატურაში.