2026 წლის ევროვიზიაზე ხორვატია Lelek-მა წარადგინა. ხუთი გოგოსგან შემდგარმა ეთნო-პოპ ჯგუფმა მსოფლიოს ყველაზე მასშტაბური მუსიკალური კონკურსის სცენაზე სიმღერა Andromeda შეასრულა და საკუთარი ქვეყანა ევროფესტივალის ფინალში დააბრუნა, საბოლოოდ კი მე-15 ადგილი დაიკავა.

Lelek-მა, რომელიც 2024 წელს შეიქმნა, ევროვიზიაზე მოხვედრა შარშანაც სცადა, მაგრამ მაშინ ჯგუფი ხორვატიის შიდაშესარჩევ კონკურსში მე-4 ადგილს დასჯერდა. ანსამბლი მსმენელს ტრადიციული ხორვატიული მუსიკისა და თანამედროვე პოპის ნაზავს სთავაზობს. თუმცა, ბევრმა არ იცის, რომ Lelek-ს ქართული ფოლკლორის საქვეყნოდ ცნობილი ნიმუშის, განდაგანას, ხორვატიული ვერსიაც აქვს ჩაწერილი. მეტიც, აჭარული სიმღერის "ქავერი", სახელწოდებით Tanani Nani, ჯგუფისთვის სადებიუტო სინგლი იყო.

რაც შეეხება Lelek-ის საევროვიზიო სიმღერას, ეთნო-პოპ ბალადა Andromeda ხორვატიის ისტორიის ერთ-ერთ ყველაზე მძიმე მონაკვეთს, ოტომანების იმპერიის მიერ დაპყრობის შემდეგ ქრისტიანების დევნას შეეხება. სწორედ ამიტომ, ჯგუფს ევროვიზიის სცენაზე დრამატული დადგმა ჰქონდა წარმოდგენილი, შემსრულებლებს კი სახეები უძველესი ტატუირებით დაეფარათ. ეს ტრადიციული "ტატუები", სახელად "სიცანიე", ჯერ კიდევ ქრისტიანობამდელ ეპოქაში გაჩნდა, მაგრამ კათოლიკე ხორვატებში მასობრივად მე-15 საუკუნეში გავრცელდა, როცა ოტომანი დამპყრობლებისგან დასაცავად ადგილობრივი მოსახლეობა ბავშვების სხეულებზე სხვადასხვა ქრისტიანულ სიმბოლოს გამოსახავდა.

აღსანიშნავია, რომ ხორვატიას ევროვიზიის ნახევარფინალში საქართველოსგანაც ერგო ქულები. პირველ ნახევარფინალურ ტურში საქართველოს ჟიურიმ Lelek-ს მე-8 ადგილი და 3 ქულა არგუნა, ქართველი ტელემაყურებლისგან კი ჯგუფმა 1 ქულა მიიღო.

შეგახსენებთ, რომ საიუბილეო, რიგით 70-ე ევროვიზია ბულგარეთის გამარჯვებით დასრულდა. 27 წლის ბულგარელმა პოპვარსკვლავმა დარამ, სიმღერით Bangaranga, თავის ქვეყანას ევროფესტივალზე პირველი მოგება მოუტანა. შესაბამისად, მომდევნო წელს კონკურსი სწორედ ბულგარეთში გადაინაცვლებს.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...