უნგრეთის ახალი პრემიერმინისტრი საკუთარი და სამთავრობო თანამდებობის პირების ხელფასებს გაანახევრებს. არჩევნებში გამარჯვების შემდეგ, პეტერ მადიარმა RTL Hungary-თან ინტერვიუში საჯარო სექტორში ხარჯების მასშტაბური შემცირება გამოაცხადა.

პრემიერმინისტრის თქმით, ის საკუთარი ხელფასის განახევრებას აპირებს. მისი წინამორბედის, ვიქტორ ორბანისგან განსხვავებით, მადიარი გეგმავს აიღოს მხოლოდ პრემიერმინისტრისა და პარლამენტის წევრის ანაზღაურება. რაც მთლიანობაში თვეში დაახლოებით 3.8 მილიონი ფორინტი იქნება, ანუ დაახლოებით 10 500 ევრო. მაშინ როცა უნგრეთის ყოფილი პრემიერმინისტრის, ვიქტორ ორბანის ყოველთვიური ანაზღაურება 7.8 მილიონი ფორინტი ($25 500) იყო.

შემოსავლების შემცირება ასევე შეეხება მინისტრებს, სახელმწიფო მდივნებს, პარლამენტის წევრებს, მერებს და სახელმწიფო კომპანიების ხელმძღვანელებს. მადიარის თქმით, რთულ დროს პოლიტიკოსებმა "უნდა იმსახურონ და არა გამოიმუშაონ".

გარდა ამისა, მთავრობა გეგმავს, პარლამენტის წევრებისთვის საკომპენსაციო გადასახადიც შეამციროს. ადრე პარლამენტარებს ტრანსპორტირებისთვის, საცხოვრებლისთვის და თანამშრომლების ხელფასებისთვის თვეში 7 მილიონი ფორინტის მიღება შეეძლოთ, მადიარი ამ თანხის 5 მილიონ ფორინტამდე შემცირებას აპირებს.

როგორც პრემიერმინისტრმა აღნიშნა, პოტენციური ბიუჯეტის დანაზოგი შეიძლება დაახლოებით 50 მილიარდ ფორინტს შეადგენდეს, რაც დაახლოებით 139 მილიონ ევროს უდრის.

უნგრეთში საშუალო ხელფასი ამჟამად თვეში დაახლოებით 640 000 ფორინტს შეადგენს, ანუ დაახლოებით 1 630 ევროს. ამ ფონზე, მაღალი თანამდებობის პირების შემოსავლები მნიშვნელოვნად აღემატება საშუალო მაჩვენებელს.