თითქმის ერთი წელი სრულდება, რაც საქართველოში ტერმინი ნეობანკი აქტუალური გახდა. ერთ-ერთი მთავარი მიზეზი - პირველი სრულად ციფრული ბანკის სფეისის გამოჩენა იყო ბაზარზე. საკმაოდ ხმაურიანი განაცხადით "დაემშვიდობე ბანკებს" სფეისმა მაშინვე მიიპყრო ყურადღება და გაშვებიდან 10 თვეში 100,000 რეგისტრირებული მომხმარებელიც იზეიმა.

3 მილიარდი ეს არის პროგნოზირებული რიცხვი იმ ადამიანებისა, რომლებიც 2021 წელს ყოველდღიურ საბანკო ოპერაციებს მხოლოდ საკუთარი სმარტფონებით, ლეპტოპებით ან იმ დროისთვის ახალგამოგონილი საშუალებით გააკეთებენ.

ციფრული ბანკინგი ახალი კატეგორიაა სერვისში, რომელიც მომხარებელს ფინანსური ოპერაციების მთლიანად ონლაინ განხორციელების საშუალებას აძლევს. მათ არ აქვთ ფილიალები და არსებობენ, მხოლოდ ციფრულ სივრცეში.

რატომ ხდება ციფრული ბანკინგი უფრო და უფრო პოპულარული გლობალურ ბაზარზე, მაშინ როცა ტრადიციული ბანკები ისედაც საკმაოდ განვითარებულები არიან?

იმიტომ რომ, მილენიალები და მათი შემდეგი თაობა Z კარგავენ ლოიალობას არსებული ფინანსური ბრენდების მიმართ. ეს თაობა არის ტექნოლოგიურად განვითარებული, ძალიან დაკავებული და მათთვის დრო ყველაზე ძვირფასია. ამავდროულად ვერ ხვდებიან, რატომ უნდა გადაიხადონ ზედმეტი გართულებულ სერვისში, როდესაც იმავეს მიღება გაცილებით მარტივად, ციფრული არხით და იაფად შეუძლიათ. სამუშაო საათებში, მათ არ სცალიათ ყოველდღიური ფინანსური ოპერაციების შესასრულებლად, სამსახურის შემდეგ კი ბანკები იკეტება (არსებული ბანკების ბევრი ციფრული სერვისიც კი არ არის ხელმისაწვდომი არასამუშაო დროს).

მოკლედ რომ ვთქვათ, ტრადიციული ბანკები ფეხს ვეღარ უწყობენ თანამედროვე ადამიანის მოთხოვნებს. სწორედ ამიტომ ჩნდება სფეისის მსგავსი ნეობანკები მთელს მსოფლიოში, რომლებიც ბევრის მოსაზრებით მომავალში მთლიანად ჩაანაცვლებენ ბანკების იმ ფორმას, რომელსაც დღეს ჩვენ ვიცნობთ.

რა უპირატესობები აქვთ ამ მომავლის ბანკებს?

  • შესაძლებელია გათვალისწინება და გამოსწორება ყველა პრობლემის, რომელიც ტრადიციულ ბანკებს ახასიათებთ;
  • საოპერაციო ხარჯები მინიმალურია;
  • პროცესები გამარტივებულია და ჰგავს ინსტაგრამზე ფოტოს ატვირთვას;
  • მყისიერი პროცესებია, არ სჭირდება ლოდინი;
  • მომხარებლის ინფორმაცია დაცულია და ამუშავებს სისტემა და არა ადამიანი;
  • ბევრად მოქნილია და ორიენტირებული განვითარებაზე მომხმარებლის უკუკავშირის გათვალისწინებით;
  • არ არსებობს არასამუშაო დრო, ყველა სერვისი 24/7-ზეა;
  • როდესაც ყველა მომსახურება თავიდანვე ციფრული არხისთვის არის შექმნილი, ბევრად უკეთეს გამოცდილებას გთავაზობს, ვიდრე თუნდაც ტრადიციული ბანკების სერვისის ციფრული ვერსიები;

მსოფლიოში ცნობილი ციფრული ბანკებია: N26, Monzo, Revolut, Starling ... მათ სიას უკვე ქართული სფეისიც შეუერთდა. სფეისის წარმატება გვაფიქრებინებს, რომ დიდხანს მარტო არ დარჩება ბაზარზე და ეს ახალშექმნილი კატეგორია საბანკო სექტორში გაიზრდება და განვითარდება.