"ჩვენ ვენდობით ამ ხალხს [იუსტიციის უმაღლეს საბჭოს], ისინი ჩვენი ნაწილი არიან, ჩვენგან გამოვიდნენ და შესაბამისად, ჩვენს ინტერესებს იცავენ", — განაცხადა მოსამართლე მაკა გორგოძემ და იქვე დაამატა: "რა თქმა უნდა სახელმწიფოს ინტერესებსაც".

მოსამართლეთა რიგგარეშე კონფერენციააზე სიტყვით გამოსვლისას განცხადების ძირითადი ნაწილი მაკა გორგოძემ დიმიტრი გვრიტიშვილისა და ლევან მურუსიძის ქებას დაუთმო:

"ვინც პიროვნული მახასიათებლებით იცნობს ბატოლ ლევანს [მურუსიძეს], ბატონ დიმიტრი გვრიტიშვილს, რომელ ადამიანს შეუძლია თქვას, რომ მათ აქვთ იმის პიროვნული თვისებები, რომ რომელიმე ადამიანზე იძალადონ, დააშინონ, ან რაიმე მაკომპრომეტირებელი ინფორმაციის გავრცელებით დაემუქრონ. თუ ასეთი ადამიანია ამ დარბაზში, რომ ასე შეემთხვა, ერთმა მაინც თქვას და მე სისხლის უკანასკნელ წვეთანმდე მის გვერდით ვიქნები. ვიცი, რომ ეს ასე არ არის".

მაკა გორგოძე 2016 წლიდან სამწლიანი გამოსაცდელი ვადით გამწესდა ქუთაისის სააპელაციო სასამართლოს სისხლის სამართლის საქმეთა პალატის მოსამართლედ. 2012-2016 წლებში იყო ქუთაისის საქალაქო სასამართლოს მაგისტრატი მოსამართლე წყალტუბოს მუნიციპალიტეტში.

კონფერენციაზე სიტყვით გამოსვლებს დამსწრე მოსამართლეები აპლოდისმენტებით ხვდებოდნენ. იუსტიციის უმაღლესი საბჭოს არამოსამართლე წევრმა, ნაზი ჯანეზაშვილმა თქვა, რომ კონფერენციაზე განსხვავებული აზრი არ გაჟღერებულა. ჯანეზაშვილის სიტყვით გამოსვლას დარბაზში ხმაური მოჰყვა. მოსამართლეთა ნაწილი ითხოვდა, მისთვის მიკროფონი გაეთიშათ და ტრიბუნიდან ჩამოეყვანათ.

კონფერენციის ბოლოს მოსამართლეებმა საერთო განცხადება გაავრცელეს, სადაც ბოლო პერიოდში მართლმსაჯულების სისტემაში განვითარებულ მოვლენებს აფასებენ. მათ შორის, უზენაესი სასამართლოს მოსამართლეების არჩევის საკითხს.

მოსამართლეები აცხადებენ, რომ უნდა შეწყდეს ზეწოლა სასამართლო ხელისუფლებაზე და მიეცეს მას შესაძლებლობა მშვიდ გარემოში განაგრძოს საქმიანობა.