კომპანია ყაზტრანსგაზ-თბილისი დიდ დიღომში მომხდარ ტრაგედიასთან დაკავშირებით აცხადებს, რომ 16 იანვრის დილით ორჯერ შევიდა შეტყობინება, თუმცა მათმა ჯგუფმა ადგილზე გაზის გაჟონვა ვერ დააფიქსირა:

კომპანიის მტკიცებით, ჯგუფმა მოქალაქეების თანდასწრებით შეამოწმა შეტყობინებაში მითითებული ადგილები: ლიფტის შახტი და კორპუსის მიმდებარედ არსებული ჭები:

"აღნიშნული ადგილები შემოწმდა ბუნებრივი გაზის კონცენტრაციის დამდგენი სპეციალური აპარატით GASURVEYOR 3-500-ით. დეტექტორმა გაზის გაჟონვა არ დააფიქსირა".

კომპანია აცხადებს, რომ შემოწმების შედეგების შესახებ ყაზტრანსგაზ-თბილისის სპეციალისტებმა შეადგინეს შემოწმების აქტი, რომელიც დამოწმებულია საავარიო ჯგუფის წარმომადგენლებისა და განმცხადებლების ხელმოწერებით.

ყაზტრანსგაზი წერს, რომ აფეთქება მოხდა, სავარაუდოდ, მე-6 სართულზე მდებარე 49-ე ბინაში:

"რამდენიმე ბინაში (მათ შორის, აფეთქებული ბინის მეზობელთან) დამონტაჟებული ბუნებრივი გაზის გაჟონვის დეტექტორები დენის წყაროდან გამორთული იყო. აფეთქების გამომწვევი მიზეზი ამ ეტაპზე ჩვენთვის უცნობია".

ადგილობრივების ცნობით, საცხოვრებელ კორპუსში გაზის სუნის გამო ყაზტრანსგაზის თანამშრომლები გამოიძახეს და მისვლის შემდეგ კი მათ თქვეს, რომ საშიში არაფერი იყო. კომპანიის პირველ განცხადებაში, რომელიც შემთხვევიდან რამდენიმე საათში გავრცელდა, არ იყო ნათქვამი იმყოფებოდნენ თუ არა მათი წარმომადგენლები ამ კორპუსში.

აფეთქება დიდ დიღომში

16 იანვარს, საღამოს თბილისში, დიდ დიღომში, ავთანდილის ქუჩაზე საცხოვრებელი კორპუსის მეექვსე სართული, სავარაუდოდ, გაზის გაჟონვის შედეგად აფეთქდა. შემთხვევის შედეგად გარდაიცვალა ოთხი ადამიანი, მათ შორის 4 წლის ბავშვია. სხვადასხვა სახის დაზიანება მიიღო რვა ადამიანმა.

თბილისის მერიის პრესსამსახურში ამბობენ, რომ კორპუსი, რომელშიც აფეთქება მოხდა ექსპლუატაციაში შესული არაა.

შინაგან საქმეთა სამინისტრომ საქმეზე გამოძიება სისხლის სამართლის კოდექსის 240¹-ე მუხლის მესამე ნაწილით დაიწყო. ამ მუხლით გაზის განლაგების, დაპროექტების ან ექსპლუატაციის დროს უსაფრთხოების წესების დარღვევა, რამაც ორი ან მეტი ადამიანის სიცოცხლე იმსხვერპლა ისჯება თავისუფლების აღკვეთით ვადით ექვსიდან ათ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

დიდ დიღომში მომხდარი ტრაგედიის გამო 17 იანვარი გლოვის დღედ გამოცხადდა.