16 იანვარს, დაახლოებით 21 საათზე თბილისში, დიდ დიღომში, ავთანდილის ქუჩაზე აფეთქების ხმა გაისმა. რამდენიმე წუთში გავრცელდა ინფორმაცია, რომ ახალაშენებულ საცხოვრებელ კორპუსში, მეექვსე სართულზე, სავარაუდოდ, ბუნებრივი აირი აფეთქდა. გამოძიება ჯერ დამთავრებული არ არის და ეს ვერსია არ დადასტურებულა.

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ფოტო: გვანცა ნემსაძე / On.ge

შემთხვევიდან რამდენიმე წუთში ცნობილი გახდა, რომ აფეთქების შედეგად გარდაიცვალა სამი ადამიანი, მოგვიანებით კი საავადმყოფოში გადაყვანილი არასრულწლოვანიც. გარდა ამისა, აფეთქების შედეგად დაშავდა რვა ადამიანი, მათ შორის არასრულწლოვნებიც. მათგან ოთხი არასრულწლოვანი საავადმყოფოდან გამოწერეს, ერთი რეანიმაციაში რჩება.

ფოტო: On.ge

ფოტო: გვანცა ნემსაძე / On.ge

ადგილობრივების ცნობით, საცხოვრებელ კორპუსში გაზის სუნის გამო ყაზტრანსგაზის თანამშრომლები გამოიძახეს და მისვლის შემდეგ კი მათ თქვეს, რომ საშიში არაფერი იყო. კომპანიის პირველ განცხადებაში, რომელიც შემთხვევიდან რამდენიმე საათში გავრცელდა, არ იყო ნათქვამი იმყოფებოდნენ თუ არა მათი წარმომადგენლები ამ კორპუსში. მაგრამ განმარტეს, რომ საგანგებო რეჟიმში მუშაობენ და განცხადებას დეტალების დაზუსტების შემდეგ გაავრცელებდნენ. ახლა ეს განცხადება Facebook-ზე აღარ იძებნება.

ფოტო: On.ge

შინაგან საქმეთა სამინისტრომ გამოძიება სისხლის სამართლის კოდექსის 240¹-ე მუხლის მესამე ნაწილით დაიწყო. ამ მუხლით გაზის განლაგების, დაპროექტების ან ექსპლუატაციის დროს უსაფრთხოების წესების დარღვევა, რამაც ორი ან მეტი ადამიანის სიცოცხლე იმსხვერპლა ისჯება თავისუფლების აღკვეთით ვადით ექვსიდან ათ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე. უწყების პრესსამსახურში დღეს, 17 იანვარს On.ge-ს განუცხადეს, რომ უკვე გამოიკითხა ყაზტრანსგაზ-თბილისის რამდენიმე თანამშრომელი და ადგილზე გრძელდება საგამოძიებო მოქმედებები.

ფოტო: გვანცა ნემსაძე / On.ge

თბილისის მერიის პრესსამსახურში კი ამბობენ, რომ კორპუსი, რომელშიც აფეთქება მოხდა ექსპლუატაციაში შესული არაა. კორპუსის სიმყარის შემოწმება კრიმინალისტების მუშაობის დასრულების შემდეგ დაიწყება, დაზიანებული ბინები შეკეთდება. მანამდე ამ კორპუსში მცხოვრები 31 ადამიანი დროებით საცხოვრებელშია გადაყვანილი და მათ კვებასა და ხარჯებზე პასუხისმგებლობა გამგეობამ აიღო.

ტრაგედიის გამო 17 იანვარი გლოვის დღედ გამოცხადდა.