აფხაზეთისა და სამხრეთ ოსეთის დე ფაქტო რესპუბლიკების პრეზიდენტები ვენესუელაში პრეზიდენტ ნიკოლას მადუროს ინაუგურაციას დაესწრებიან. ღონისძიება კარაკასში 10 იანვარს გაიმართება.

სამხრეთ ოსეთის დე ფაქტო პრეზიდენტი, ანატოლი ბიბილოვი უკვე ჩავიდა კარაკასში. სახელისუფლებო გამოცემის ინფორმაციით, ბიბილოვს აეროპორტში ვენესუელის საგარეო საქმეთა მინისტრის მოადგილე შეხვდა. ბიბილოვის დელეგაციის წევრები არიან მისი მრჩეველი, საგარეო საქმეთა დე ფაქტო მინისტრი და სამხრეთ ოსეთის დე ფაქტო ელჩი ვენესუელაში. ვიზიტი ორი დღე გაგრძელდება.

რაც შეეხება აფხაზეთის დე ფაქტო პრეზიდენტს, რაულ ხაჯიმბას, ორდღიანი ვიზიტის ფარგლებში ისიც დაესწრება ინაუგურაციას. გარდა ამისა, ნიკოლას მადუროსთან მოლაპარაკებებს გამართავს და ვენესუელა-აფხაზეთის ურთიერთობებს განიხილავს.

ვენესუელა ერთ-ერთი იმ ხუთ ქვეყანას შორის, რომელმაც აფხაზეთისა და სამხრეთ ოსეთის დე ფაქტო რესპუბლიკები აღიარა. 2008 წლის აგვისტოს ომის შემდეგ რესპუბლიკები რუსეთმა, ნაურუმ, ნიკარაგუამ და სირიამაც აღიარეს.

ნიკოლას მადურო ვენესუელის პრეზიდენტად მეორე ვადით 2018 წლის მაისში აირჩიეს. არჩევნების შედეგები ლათინური ამერიკისა და დასავლეთის ქვეყნებმა გააკრიტიკეს. პროტესტის ნიშნად ბრაზილიამ, არგენტინამ და კანადამ თავიანთი ელჩები გაიწვიეს. ამავე მიზეზით, აშშ-მ ვენესუელას დამატებითი სანქციები დააწესა. აშშ-ს პრეზიდენტმა, დონალდ ტრამპმა ვენესუელისგან რეპრესიების შეჩერება და ახალი არჩევნების დანიშვნა მოითხოვა.

გარდა ამისა, ბოლო რამდენიმე წელია ქვეყანა ეკონომიკურ კრიზისშია, რაც ჰიპერინფლაციით არის გამოწვეული.

ამავე თემაზე: