იუსტიციის უმაღლესი საბჭოს მოსამართლე წევრებმა საკუთარი განცხადებებით მოსამართლის მანტია გაიხადეს და პოლიტიკურ ველზე შემოვიდნენ, სადაც ვპირდებით, რომ წარმატებას ვერ მიაღწევენ", — ასე გამოეხმაურა ქართული ოცნების დეპუტატი ლევან გოგიჩაიშვილი იუსტიციის უმაღლესი საბჭოს მოსამართლე წევრების განცხადებას, რომ ის და ბესელია სასამართლო სისტემაში თავისი კადრების შეყვანას ცდილობენ.

დეპუტატის თქმით, საზოგადოებას ბოლო დღეებმა აჩვენა, რომ არ აპირებენ, უზენაეს სასამართლოში ის ადამიანები დააბრუნონ, რომლებიც წლების განმავლობაში ადეიშვილს, სააკაშვილს, დიქტატურას, ადამიანის უფლებების დარღვევასა და უდანაშაულო ადამიანების ციხეში გაგზავნას ემსახურებოდნენ.

"საკუთარი განცხადებებით მოსამართლის მანტია გაიხადეს და პოლიტიკურ ველზე შემოვიდნენ, სადაც ვპირდებით, რომ წარმატებას ვერ მიაღწევენ. საკითხი მალე ისე დადგება, რომ იუსტიციის საბჭოს უნდა დავემშვიდობოთ, რადგან ეს ადამიანები თავისი მორალით არ შეეფერებიან მოსამართლეებს. რეფორმა, რომელსაც გაზაფხულზე დავიწყებთ და კრიტერიუმებს გავწერეთ, გავრცელდება იმ მოსამართლეებზე, რომლებიც პირველ და მეორე ინსტანციაში იმყოფებიან. მორალური და პროფესიული კრიტერიუმებია. არ ვფიქრობ, რომ ეს ადამიანები მორალურ კრიტერიუმებს აკმაყოფილებენ", — განაცხადა ლევან გოგიჩაიშვილმა.

იუსტიციის უმაღლესი საბჭოს მოსამართლე წევრები ეკა ბესელიასა და მის თანამოაზრეებს მუქარაში, სასამართლოზე ზეწოლასა და სასამართლოს საქმიანობაში ჩარევაში ადანაშაულებენ. ამის შესახებ მათ საგანგებო განცხადება გაავრცელეს.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი