Reuters-ის ექსკლუზიური ინფორმაციით, ვლადიმირ პუტინი მოითხოვს, რომ უკრაინამ დათმოს მთელი დონბასის რეგიონი, უარი თქვას ნატოში გაწევრიანების ამბიციებზე, დარჩეს ნეიტრალური და არ დაუშვას დასავლური ჯარები ქვეყანაში.

რუსული წყაროების თანახმად, პუტინმა შეცვალა 2024 წლის ივნისის მოთხოვნები, რომლის მიხედვითაც კიევს უნდა დაეთმო ის ოთხი პროვინცია, რომელსაც მოსკოვი რუსეთის ნაწილად მიიჩნევს: დონეცკი და ლუგანსკი აღმოსავლეთ უკრაინაში — რომლებიც დონბასის რეგიონს შეადგენს — და ხერსონი და ზაპოროჟიე სამხრეთში.

კიევმა ამ პირობებს, როგორც კაპიტულაციის ტოლფას ნაბიჯს, უარით უპასუხა.

პუტინი ახალ წინადადებაში კვლავ მოითხოვს, რომ უკრაინამ მთლიანად დატოვოს დონბასის ის ნაწილები, რომლებსაც ჯერ კიდევ აკონტროლებს, მაგრამ ამავდროულად, მოსკოვი შეაჩერებს ამჟამინდელ ფრონტის ხაზებს ზაპოროჟიესა და ხერსონში.

Reuters-ის ცნობით, ამჟამად რუსეთი აკონტროლებს დონბასის 88%-ს და ზაპოროჟიასა და ხერსონის 73%-ს.

Reuters-ის წყაროების განცხადებით, მოსკოვი ასევე მზად არის დათმოს ხარკოვის, სუმისა და დნეპროპეტროვსკის რეგიონების მცირე ნაწილები, რომლებიც ამჟამად მის კონტროლქვეშაა.

პუტინი ასევე დაჟინებით მოითხოვს, რომ უკრაინამ უარი თქვას ნატოში გაწევრიანებაზე და მოითხოვს აშშ-ის ხელმძღვანელობით სამხედრო ალიანსისგან იურიდიული ვალდებულების გარანტიას, რომ ის აღმოსავლეთით აღარ გაფართოვდება. გარდა ამისა, მოითხოვს უკრაინული ჯარის შეზღუდვას და შეთანხმებას, რომ დასავლური ჯარები, როგორც სამშვიდობო ძალა, არ განლაგდება უკრაინის ტერიტორიაზე.

პრეზიდენტმა ვოლოდიმირ ზელენსკიმ არაერთხელ უარყო იდეა, რომლის მიხედვითაც უკრაინა საერთაშორისო დონეზე აღიარებულ მიწებს დათმობს შეთანხმების ფარგლებში და თქვა, რომ დონბასი, როგორც სამრეწველო რეგიონი, რუსეთის შეტევების წინააღმდეგ დამცავ ციხესიმაგრეს წარმოადგენს.