სასაზღვრო გამტარ პუნქტ "დარიალთან" მყოფი 65 უკრაინის მოქალაქე ჩარტერული რეისით, მესამე ქვეყნის გავლით სამშობლოში დაბრუნდა. ამის შესახებ ინფორმაციას საქართველოს შინაგან საქმეთა სამინისტრო ავრცელებს.

"საქართველოს შინაგან საქმეთა სამინისტროსა და უკრაინულ მხარეს შორის ხანგრძლივი და მრავალმხრივი მოლაპარაკებების შედეგად, სასაზღვრო გამტარ პუნქტ "დარიალთან" მყოფი უკრაინის 65 მოქალაქე სამშობლოში ნებაყოფლობით, ჩარტერული რეისით, მესამე ქვეყნის გავლით დაბრუნდა.

შინაგან საქმეთა სამინისტრომ უზრუნველყო უკრაინის მოქალაქეთა გადმოყვანა სასაზღვრო გამტარ პუნქტ "დარიალიდან" თბილისის საერთაშორისო აეროპორტში, სადაც მოხდა მათი უკრაინის სამართალდამცავი ორგანოს წარმომადგენლებისთვის გადაცემა. თავის მხრივ, მათ უზრუნველყვეს უკრაინის მოქალაქეთა ბორტზე განთავსება და ჩარტერული რეისით მგზავრობისას მათი თანხლება", — წერია შსს-ს მიერ გავრცელებულ განცხადებაში.

შსს-ს ინფორმაციით, საზღვართან ჯერ კიდევ რჩება იმ პირთა გარკვეული ნაწილი, რომელთა სამშობლოში დაბრუნებაზეც მოლაპარაკებები კვლავ მიმდინარეობს.

"აღსანიშნავია, რომ საქართველოს სახელმწიფო საზღვართან კვლავ რჩება იმ პირთა გარკვეული ნაწილი, რომელთა სამშობლოში ორგანიზებულ, უსაფრთხო და ნებაყოფლობით დაბრუნებაზე ქართული მხარე ინტენსიურად განაგრძობს მოლაპარაკებებს უკრაინულ მხარესთან და საერთაშორისო ორგანიზაციებთან", — წერია განცხადებაში.

ცნობისთვის, ივლისში გავრცელდა ინფორმაცია, რომ რუსეთის მიერ დეპორტირებული თითქმის 60 უკრაინელი რუსეთ-საქართველოს საზღვარზე იყო ჩარჩენილი და ისინი იძულებულნი იყვნენ სარდაფში ეცხოვრათ, რადგან უკან დაბრუნების ნებართვა არ ჰქონდათ.

მოგვიანებით შსს-მ გაავრცელა ინფორმაცია, სადაც აღნიშნული იყო, რომ დარიალზე 80-მდე უკრაინელი იმყოფებოდა და მათ უმრავლესობას მძიმე კრიმინალური წარსული ჰქონდა. განცხადებაში ასევე აღნიშნული იყო, რომ "ქართულმა მხარემ უკრაინულ მხარეს შესთავაზა რამდენიმე მექანიზმი, თუ როგორ შეიძლება მოხდეს ე.წ. ნეიტრალურ ზონაში მყოფი ადამიანების უსაფრთხოდ გაყვანა და დაბრუნება მათ სამშობლოში. ჩვენ მიერ შეთავაზებული იყო როგორც საჰაერო, ასევე საზღვაო გზით, მოცემულ პირთა სამშობლოში დაბრუნების ვერსიები".