რიანას 2018 წელი ნამდვილად აქტიური იყო — გვაჩუქა გრემიზე ცეცხლოვანი შესრულება, წარმატებულად განაგრძო 2017 წელს გამოშვებული პარფიუმერიის ხაზის Fenty-ის ბიზნესი, მონაწილეობა მიიღო ორ ფილმში: Ocean's 8 და Guava Island, ძალადობის წამახალისებელი რეკლამის შემდეგ დაუპირისპირდა Snapchat-ს და როცა მასსა და შეყვარებულის ჩხუბზე ტვიტერმა მიმების ბრძოლა გამართა — მთელი მსოფლიო დატროლა.

მაგრამ, რიანას მუსიკის ფანებისთვის ეს ყველაფერი არასდროსაა საკმარისი. ისინი ბარბადოსელი ლამაზმანის ყველა ნაბიჯს უჭერენ მხარს, თუმცა მაინც ახალი მუსიკის მოლოდინში არიან.

და სანამ მათ გააკრიტიკებთ, ნუ დაგავიწყდებათ, რომ რიანას ბოლო ალბომის, Anti-ის გამოსვლიდან 27 იანვარს სამი წელი გადის.

ასე რომ, სულ ცოტა ხნის წინ, როცა ინსტაგრამზე Fenty-ის ახალ პროდუქტს უწევდა რეკლამას, ფანმა რიანას ჰკითხა:

"კი მაგრამ რობინ [რიანას ნამდვილი სახელია რობინ რიანა ფენტი], ახალ ალბომს როდის ველოდოთ? შეგიძლია თარიღი გვითხრა?"

რიანამ კონკრეტული რიცხვის დასახელებისგან თავი შეიკავა და მოკლედ უპასუხა:

"2019".

მოგვიანებით, რიანამ ფანების აჟიოტაჟი კიდევ ერთხელ გამოიწვია, როცა ინსტაგრამ სთორიში ეს რამდენიმეწამიანი ვიდეო დაპოსტა, წარწერით:

"ფანები: სად არის ალბომი?
მე:"

ასე რომ, მოლოდინის რეჟიმს ცნობისმოყვარეობის მდგომარეობაც დაემატა. თუმცა, შეგვიძლია ვთქვათ, რომ რიანას ფანებს +1 მიზეზი აქვთ, რის გამოც 2019 წელი მათთვის ძალიან კარგი იქნება.