შინაგან საქმეთა სამინისტრო აცხადებს, რომ ინაუგურაციის პარალელურად, 16 დეკემბერს, კახეთში მომხდარ ინციდენტში მონაწილე კიდევ ერთი პირი დააკავეს.

უწყების ცნობით, დაკავებულია 1960 წელს დაბადებული პირი, რომელიც თბილისში აიყვანეს. გამოძიების ვერსიით, ბრალდებულმა სოფელ ველისციხესთან პოლიციის ავტომანქანა დააზიანა.

გამოძიება სისხლის სამართლის კოდექსის 187-ე მუხლის პირველი ნაწილით მიმდინარეობს, რაც სხვისი ნივთის დაზიანებას გულისხმობს. უწყების ინფორმაციით, გრძელდება ინციდენტების ამსახველი ვიდეომასალის შესწავლა.

იმავე აქციის მონაწილე დააკავეს გუშინ, 18 დეკემბერს, გარდაბნის რაიონში დააკავეს, პოლიციელზე თავდასხმის ბრალდებით.

17 დეკემბერს კი ნაციონალური მოძრაობის პოლიტსაბჭოს წევრი, დავით კირკიტაძე დააკავეს. კიკრიტაძეს ველისციხეში მომხდარი ინციდენტის დრო პოლიციელზე თავდასხმა, ფიზიკური შეურაცხყოფა და ქონების დაზიანება ედება ბრალად. პოლიტიკოსი დანაშაულს არ აღიარებს და შიმშილობს.

დავით კირკიტაძის მხარდასაჭერად დღეს, 19 დეკემბერს გაერთიანებული ოპოზიციის წევრებმა აქცია გამართეს გურჯაანის რაიონულ სასამართლოსთან.

დაპირისპირება ველისციხეში

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.

გაერთიანებულმა ოპოზიციამ 18 დეკემბრიდან "უწყვეტი" აქციები დააანონსა. გრიგოლ ვაშაძის განცხადებით, საქართველოს ხელისუფლებამ მოპარული არჩევნების შემდეგ მოქალაქეების კონსტიტუციური უფლებები შეზღუდა.