ძალა ერთობაშიას ლიდერის, გრიგოლ ვაშაძის განცხადებით, გაერთიანებული ოპოზიცია, ხვალიდან, 18 დეკემბრიდან აქციებს აანონსებს. გრიგოლ ვაშაძის თქმით, აქციის შესახებ დამატებითი დეტალები მათ მხარდამჭერებს მოგვიანებით ეცნობებათ.

მისივე თქმით, საქართველოს ხელისუფლებამ მოპარული არჩევნების შემდეგ მოქალაქეების კონსტიტუციური უფლებები შეზღუდა.

გაერთიანებული ოპოზიციის ყოფილი საპრეზიდენტო კანდიდატი ამბობს, რომ ისინი რიგგარეშე საპარლამენტო არჩევნებს, კომისიების თავიდან დაკომპლექტებასა და არჩევნების პროპორციული სისტემით ჩატარებას ითხოვენ.

"აქციები არ შეწყდება არც ერთი დღე. ხვალ ჩვენ ვიწყებთ შეუწყვეტელ აქციებს, რომელიც იქნება მშვიდობიანი, საქართველოს კონსტიტუციის ფარგლებში", — განაცხადა ვაშაძემ.

ველისციხეში მომხდარი დაპირისპირების შემდეგ გაერთიანებულმა ოპოზიციამ აქცია საქართველოს პარლამენტთან გააგრძელა. ძალა ერთობაშიას ლიდერების სიტყვით გამოსვლები გვიან ღამემდე გაგრძელდა. გრიგოლ ვაშაძემ განაცხადა, რომ ოპოზიციის სამომავლო გეგმებზე გუნდთან შეთანხმების შემდეგ ისაუბრებდა.

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდია. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.