საქართველოს შინაგან საქმეთა მინისტრმა, გიორგი გახარიამ მადლობა გადაუხადა იმ პოლიციელებს, რომლებსაც თელავისკენ მიმავალი გზა ჰქონდათ გადაკეტილი. მისი თქმით, ყველას, ვისზეც სისხლის სამართლის დანაშაულის ნიშნები იქნება, "პასუხი მოეთხოვება".

"მინდა დიდი ბოდიში მოვუხადო და დიდი მადლობა ვუთხრა თითოეულ პოლიციელს და მინდა დავპირდე მათ და სხვას არავის დღეს საღამოდან, ხვალინდელი დღიდან ყველა პროვოკაციული ქმედება, რომელიც იყო განხორციელებული სხვადასხვა წერტილებში სამართლებრივად იქნება გაანალიზებული", — აღნიშნა გახარიამ.

გაერთიანებული ოპოზიციის წარმომადგენლები სალომე ზურაბიშვილის პრეზიდენტად ინაუგურაციის პარალელურად თელავში აქციას გეგმავდნენ. იმის გამო, რომ მათ გზა რამდენჯერმე გადაუკეტეს, აქცია ვერ ჩაატარეს. საქართველოს სახალხო დამცველი, ნინო ლომჯარია შინაგან საქმეთა სამინისტროს მიმართავდა და შეახსენებდა, რომ თელავის მიმართულებით აქციის მონაწილეთა გადაადგილება კონსტიტუციური უფლებაა.