პარლამენტის დეპუტატი ქართული ოცნებიდან მამუკა მდინარაძე თელავიდან 30 კილომეტრში განვითარებულ მოვლენებს პროვოკაციას უწოდებს. მისი თქმით, ოპოზიცია განგებ იქცევა ასე.

"როდესაც არის ოთახის კარი ღია და შენ ამ ოთახში კედლიდან შეღწევას ცდილობ, ამას ძალიან რბილად შეიძლება, უწოდო პროვოკაცია. არც ვიცი კონკრეტულად რა სიტყვა გამოვიყენო, რომ პოლიტკორექტულობა შევინარჩუნო. მათ ძალიან კარგად იცოდნენ, რომ ერთი გზა იყო გახსნილი და ამ გზით ესარგებლათ. შეგნებულად, მიზანმიმართულად თავისი გეგმების განსახორციელებლად წავიდნენ იმ გზით, რომელიც იყო დაკეტილი და იქნებოდა ის, რაც მოხდა", - განაცხადა მამუკა მდინარაძემ მედიასთან ინაუგურაციის დაწყების წინ.

მისივე თქმით, ყველა დეპუტატს მოსაწყვევი ჰქონდა და ინაუგურაციაზე დასწრება შეეძლო.

თელავში აქციის მოსაწყობად მიმავალ ოპოზიციას პოლიციამ გზა გადაუკეტა. არის დაპირისპირება პოლიციასა და მოქალაქეებს შორის. აქციის მონაწილეები ცდილობენ პოლიციის მანქანები ხელით გაწიონ. ისინი გზის გახსნას ითხოვენ.

შსს ამბობს, რომ გაერთიანებული ოპოზიციის აქციის მონაწილეებს ჯერ ალტერნატიული გზა, შემდეგ კი თელავამდე ტრანსპორტირება შესთავაზეს.

შინაგან საქმეთა სამინისტროს განცხადებით, აქციის ორგანიზატორებს, სატრანსპორტო საშუალებების მრავალრიცხოვანი ნაკადიდან გამომდინარე, შეთავაზებული ჰქონდათ თელავის მიმართულებით მოძრაობის უსაფრთხო მარშრუტი.

ამავე თემაზე: