სამტრედიის პოლიციის შენობასთან გამართული აქციის დასრულების შემდეგ პოლიციის მიერ დაკავებული ერთ-ერთი აქტივისტი, გიორგი სოფრომაძე, რომელიც მოწმის სახით დაკითხეს, უკვე თავისუფალია. როგორც მისმა ადვოკატმა განაცხადა, სოფრომაძეს ხელზე სიწითლე აღენიშნებოდა და მას ექსპერტიზა ჩაუტარდა.

თავად სოფრომაძე თავის Facebook გვერდზე წერს, რომ ის უკვე სახლში იმყოფება:

"არ ინერვიულოთ. მშობლებიც შემომიერთდნენ. დანარჩენს ვრცლად დავწერ აუცილებლად. თქვენ გვერდით დგომას ვგრძნობდი დღეს ყოველ ნაბიჯზე".

20 აგვისტოს კანცელარიასთან საპროტესტო აქცია გაიმართა, რომელმაც მოგვიანებით სამტრედიაში გადაინაცვლა და რომლის მთავარი ლოზუნგი იყო: "თეთრი ხმაურის მოძრაობა დემურ სტურუასთვის, პოლიციური ძალადობის წინააღმდეგ". აქციის მონაწილეები ქვეყნაში არსებულ ნარკოპოლიტიკასა და გარდაცვლილ დემურ სტურუას მიმართ პოლიციელის მხრიდან შესაძლო ძალადობას აპროტესტებდნენ.

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა:

"პოლიციელი გ. მემუქრებოდა ვინმეს პლანი ხო არ აქო დათესილიო, უნდა მითხრაო. თორემ რაც არ გაგიკეთებია, იმას შეგტენიო, მემუქრებოდა და მანქანაში გამლახა, წამიყვანა იანეთისკენ და აქ მოგკლავო. მემუქრებოდა გ. თ. - მილიციელი. მილიციასთან უნდა ითანამშრომლოო, ვის აქვს და ვის არაო პლანი დათესილიო ან კულაშშიო ან დაფნარშიო და საჯავახოშიო. ეს მოხდა 07.08.2016 აგვისტოს, კარგად გემშვიდობებით ყველას. დემური სტურუა. 20:10. დედა დარჩი მარტო, მაგრამ რა ვქნა".

აღსანიშნავია, რომ პოლიციელმა, რომელსაც სტურუა მუქარაში ადანაშაულებდა, გამოძიების დასრულებამდე, თანამდებობა დატოვა.

სტურუას თვითმკვლელობამდე მიყვანის საქმეზე გამოძიებას დასავლეთ საქართველოს საოლქო პროკურატურის საგამოძიებო ნაწილი უკვე რამდენიმე დღეა აწარმოებს. გამოძიება სისხლის სამართლის კოდექსის 333-ე (უფლებამოსილების გადამეტება) და 115-ე (თვითმკვლელობამდე მიყვანა) მუხლებით მიმდინარეობს.
გაიგეთ მეტი: თვითმკვლელობა, დემურ სტუ